A rôh tơdah, pôa Tô Lâm, Kăn xiâm pơkuâ hnê cheăng Đảng loi khât hneăng lăm pôu dêi Pơtáu, ƀă mâu kăn xiâm veăng prôk ƀăng cho Kăn xiâm ngăn ‘na mơdró, ngăn ’na hngêi trung đăi hok, tíu xiâm tí tăng ‘nâi plĕng mâu tơdroăng, kô cho ki xiâm, ki nếo tung mơhnhôk, djâ tơrŭm cheăng tung hên kơvâ pơla Việt Nam ƀă Ƀih rế trâu rơdâ tâ, ai pơxúa, tơƀrê, ai tiô ki pơxúa dêi kuăn pơlê péa tơnêi têa, veăng ‘no hnoăng cheăng pêi tăng troăng pro hơniâp lĕm, tơniăn ƀă mơnhông krá rơdêi a kơpong ƀă tung lâp plâi tơnêi.

Vâ tơxâng ƀă tơmeăm khoăng ai hlâu ƀă tơdroăng kal kí lĕm tro, Kăn xiâm pơkuâ hnê cheăng Đảng tối nhên péa pâ tơnêi têa kal pơtối pêi trâu rơdâ tâ tung tơrŭm cheăng tê mơdró - ‘no liăn mơjiâng tơmeăm khoăng, pêi chiâk krá tơniăn, hnê mơngế pêi cheăng rơkê, ‘na túa lĕm tro, ôm hyô, trâm tơpui tơno ƀă kuăn pơlê, hlối mơdêk tâ nếo tơrŭm cheăng tung mâu kơvâ khoa hok - kŏng ngê̆ pơ’lêh nếo tơdroăng hriăn plĕng, malối tối ‘na túa pêi cheăng mơnhông mơdró kâ ing dế hriâm đăi hok dêi Ƀih, veăng gum Việt Nam ai tiô mâu pơkâ mơnhông tơƀrê troh hơnăm 2030 ƀă troh hơnăm 2045.