Măng tĭng hdrối, Khu kăn Kuô̆k hô̆i kong pơlê Dak Lak hiăng ai rôh trâm mâ kuăn pơlê a mâu tơring Krông Pač, Čư̆ Mgar, Ea Súp ƀă Buôn Đôn. Hdrối hneăng hôp má 9, Kuô̆k hô̆i hneăng 15 ƀă tơdroăng ki rĕng xing xoăng kơ koan cheăng tơnêi têa, môi tung mâu tơdroăng ki châ tơkôm má môi ki kuăn pơlê tối cho rah xo tro kăn ƀô̆ pêi cheăng tung mâu tíu cheăng nếo.

A mâu tíu trâm mâ kuăn pơlê, hên kuăn pơlê tối tơdroăng ki môi tuăn ƀă troăng hơlâ xing xoăng pro le lĕm kơ koan cheăng tơnêi têa, la xuân pâ thế ƀă tơdroăng ki xing xoăng kăn ƀô̆ athế tơtrŏng  troh ivá pêi cheăng, túa rêh ối lĕm  ƀă tơdroăng ki krâ kơhnâ ƀă kuăn pơlê. Pôa Nguyễn Duy Thành, kuăn pơlê a thôn 14 cheăm Ea Kly, tơring Krông Pač tối:

“Pro le lĕm kơ koan cheăng sap ing Tơnêi têa troh kong pơlê kuăn pơlê ngin phiu ro ƀă môi tuăn. Mê rôh kố ngin pâ thế kơ Kuô̆k hô̆i, pâ thế kơ Đảng pin athế rơdêi, kơtăng vâ ăm mâu ngế ki ai hiâm mơno, ai tuăn ngoâ rơkê, ai tơdroăng rêh ối lĕm pêi cheăng gum kuăn pơlê. Rơkê plĕng tơdroăng pro tơniăn kố ai mâu ngế ki ôh tá tŭm ivá, ôh tá tŭm troăng tơxâng mê ối rak, mê mâu ngế ki rơkê plĕng, lĕm khât ăm vâi vêh a kong pơlê”.

Tơdjâk troh tơdroăng tŏng gum rêh ối pơlê pơla, kuăn pơlê tối xuân ối ai mâu rơpŏng kơtiê, rơpoưng ki xơpá rêh ối tung hngêi ối pơtân, tơ’nhiê xi kơchoh la tá hâi châ pơxúa ing troăng hơlâ tŏng gum dêi Tơnêi têa. Pôa Thân Ngọc Duyến, thôn phước Hòa 1, cheăm Ea Kuang, tơring Krông Pač tối:

“A cheăm ngin ai môi ngế mố đô̆i hneăng hdrối nôkố pôa dế kăng kơbrê̆n, 2 ngế kuăn tro tamo ‘na tuăn ngoâ, ôh tá ai hngêi ối. Ngin cho mố đô̆i hneăng hdrối pâ thế kơ Vi ƀan mê Vi ƀan tối ăm tơring pơkâ ăm Ea Kuang 9 toăng hngêi, ôh ti ai tơ’nôm châ xếo. Nôkố, Mố đô̆i hneăng hdrối cheăm ngin  mơhnhôk tơlo hiăng pro trêi. La tiô tối tơbleăng dêi mâu kăn Kuô̆k hô̆i hôm ai rơpŏng ki kố châ pro hngêi há lơ ôh?”.

Mâu rơkong tơpui tối, pâ thế dêi kuăn pơlê hiăng châ Khu kăn Kuô̆k hô̆i ƀă kăn pơkuâ mâu Khu râ, kơvâ cheăng ƀă kăn pơkuâ Vi ƀan hnê ngăn mâu tơring tiâ tơdrêng. Ƀă mâu rơkong ki tơpui tối, pâ thế luâ tơdroăng ki chiâng tiâ mơnhên, Khu kăn Kuô̆k hô̆i kong pơlê Dak Lak tơhrâ kô pơtroh ăm mâu kơ koan ki ai tơdjâk troh séa ngăn, tơdrêng amê hlối séa ngăn nhên tơdroăng ki tŏng gum vâ rak tơniăn hnoăng pơxúa tơxâng dêi kuăn pơlê.

Tung pơla mê, a kong pơlê Lâm Đồng, phŏ kăn xiâm hnê ngăn Kuô̆k hô̆i Nguyễn Đức Hải rơtế ƀă khu kăn ki pêi dêi hnoăng cheăng hiăng pêi cheăng ƀă kong pơlê ƀă Viê̆n Hriăn ngăn mâu ngế ki rơkê plĕng Đà Lạt ‘na tơdroăng ki tơbleăng Pơkâ 57 dêi Khu xiâm pơkuâ tơdroăng kal kí ƀă Pơkâ 193 dêi Kuô̆k hô̆i, vâ pro ivá mơnhông tung mơjiâng khoa hok kong ngê̆ ƀă pơhlêh kơxô̆.

Phŏ kăn xiâm hnê ngăn Kuô̆k hô̆i tối nhên, tơdroăng ki pơkâ tíu pro troăng hơlâ tŏng gum kal séa ngăn ki ai khât, rak tơniăn tơdâng tơ’mô, tơƀrê, ví tơdroăng ki tơpui tối bô bối. Lâm Đồng xuân pâ thế rĕng pro tíu xiâm pơhlêh nếo tơmiât pêi rơkê, pơhlêh ‘na liăn ngân, pro chiâng ivá ăm tơdroăng ki mơjiâng khoa hok kong ngê̆ kong pơlê. Phŏ kăn xiâm hnê ngăn Kuô̆k hô̆i Nguyễn Đức Hải ăm ‘nâi:

“Achê kố, Khu hnê mơhno ai môi troăng hnê mơhno nhên mâu kong pơlê, ƀă tơdroăng ki vâ pêi pro tơdjuôm cho kăn pơkuâ kân má môi a kong pơlê athế hnê mơhno tơdrêng. Tơdroăng kố athế pêi pro nhên, ai pơkâ tro, ai xoăng hnoăng cheăng pêi pro nhên. Pin pro tiah lâi ai pơkâ mơ’no troăng hơlâ tŏng gum ăm khu ki hriăn ‘na khoa hok, troăng pơkâ pro pơhlêh mâu kơxô̆ liăn vâ pêi cheăng, ƀă troăng hơlâ pơkâ tŏng gum ‘na ‘no liăn cheăng kô cho kơvâ ki châ kơjo. Tiah mê Lâm Đồng kal ai tíu xiâm pơhlêh nếo tơmiât pêi rơkê ‘na kơvâ cheăng kố há lơ ôh? Hnoăng cheăng pôu râng mê ngin kô hriăn ngăn, tơkŭm vâ pơchuât tơbleăng".

Vâ pơtối tơbleăng châ tơƀrê mâu tơdroăng pơkâ kố, phŏ kăn hnê ngăn Kuô̆k hô̆i Nguyễn Đức Hải pơkâ thế kong pơlê Lâm Đồng kal séa ngăn nhên mâu tơdroăng ki kal hnê mơhno dêi Tơnêi têa, rak tơniăn krâu tơdroăng cheăng tung la ngiâ, chêh xo tâi tâng, tŭm têk, môi tuăn, tơdâng tơ’mô ƀă cho tơdroăng ki ai khât tơtro ƀă ki xiâm dêi kong pơlê. Ví chêh xo ing khu ki ê pơkâ thế ah chiâng tơdjâk troh túa pơkâ tơdjuôm, ôh tá tơƀrê. Tơdrêng amê hlối athế mơdêk khât hnoăng cheăng pôu râng, malối cho hnoăng cheăng pôu râng dêi ngế ki ối a ko tung pơkuâ, hnê mơhno tơkŭm tơbleăng, séa ngăn pêi pro hnoăng cheăng, rak vế tơbleăng tơdrăng, tơƀrê tơdrăng tro. Pôi tá pro pơxúa ăm dêi tơná ing troăng pơkâ kố, pro mơhrê liăn ngân tê kơtê.

Drêng kố, phŏ kăn xiâm hnê ngăn Kuô̆k hô̆i Nguyễn Đức Hải ƀă khu kăn ki pêi dêi hnoăng cheăng hiăng troh pôu, diâp tơmeăm ăm péa rơpŏng ki châ tơnêi têa tŏng gum a tơring Đức Trọng, kong pơlê Lâm Đồng, pơkâ thế khu kăn pơkuâ kong pơlê, rêm râ, kơvâ cheăng pơtối tơmâng ngăn tâ nếo troh tơdroăng rêh ối dêi mâu rơpŏng ki châ tơnêi têa tŏng gum, ngế ki ai hnoăng a kong pơlê.