Pôa Huỳnh Đảm, cho Kăn Hnê ngăn Vi ƀan Xiâm Măt trâ̆n Tơnêi têa Việt Nam hâk ro má môi cho Ƀlêi trâng rơnó Hơngui hơnăm 1975, pơxiâm ing tơdroăng pơkuâ dêi Đảng, dêi Pôa Hồ, pơxiâm ing ivá ó rơdêi dêi Khu lêng kuăn pơlê Việt Nam khên tơnôu, ing ivá ó rơdêi tơrŭm môi tuăn tâi tâng hdroâng mơngế. Drêng mê nah, tâi tâng hdroâng mơngế tơrŭm môi tuăn, Peăng Kơnhŏng – Peăng Hdroh tơrŭm môi tuăn, khu ki djâ troăng ahdrối krếo mê khu ki tiô parŏng kô lo lăm tơplâ, khu ki tiô parŏng krếo mê khu ki djâ troăng ahdrối hbrâ troh veăng.

Xua tơdroăng mê chiâng môi ivá ó rơdêi dêi tâi tâng hdroâng mơngế ƀă nhên khât cho ivá ing tơdroăng tơrŭm môi tuăn khu lêng – kuăn pơlê. Tiô pôa Huỳnh Đảm, hiâm mơno tơrŭm môi tuăn khu lêng kuăn pơlê kố hiăng châ mơnhên cho môi tơdroăng ki rêh lĕm tro, khên tơnôu tung Tơplâ xâ Hồ Chí Minh:

‘’Drêng mâu ƀinh đoân ki xiâm ‘’rĕng má môi’’ mot plâ, pơkuâ mâu tơdroăng ki xiâm dêi Sài Gòn – Gia Định mê drêng mê kuăn pơlê a Sài Gòn – Gia Định xuân xông rơtế pơkuâ kơpong kơphô̆, pá puât, xông tơtrâ pơkuâ rêm kơpong. Hlá cơ reăng nếo ôh tá xê to tơdah phiu ro khu lêng ƀlêi trâng hiăng vêh mê ối rak gâk kring tơniăn, gâk kring tơdroăng châ tơƀrê roh kăch măng sap ing mâu chôu phut apoăng ki pin hiăng châ ƀlêi trâng kân'’.

Trung tươ̆ng, Phŏ Yăo sư – Tiê̆n sih Trần Vi Dân, Kơ koan xiâm Khoa hok, Troăng pêi cheăng ton xŏn ƀă Tơdroăng roh ton nah Kŏng an, Khu xiâm Kŏng an tối ăm ‘nâi, tơdroăng mơjiâng ƀă rak krá hiam mơno kuăn pơlê, mơjiâng tơdroăng tơdroăng gâk kring tung hiâm mơno kuăn pơlê đi đo châ Đảng pin tơmâng păng ‘nâng. Đảng pin hiăng hnê mơhno mơjiâng, tơ’nôm hiâm mơno tơplâ tâi tâng kuăn pơlê ƀă tơdroăng tơdrăng tro lĕm ‘’ôh tá ai ki klâi kơnâ tâ tơniăn krê, tơniăn lĕm’’. Hiâm mơno ƀă tơdroăng tơdrăng tro lĕm mê a tung hiâm mơno kuăn pơlê, chiâng ivá ó rơdêi hiâm mơno, pro chiâng ivá ó rơdêi tâi tâng ôh tá ai kơbố kâi vâ ƀlêi trâng ivá rơdêi dêi ngế ki ‘mêi mot tơbriât vâ pơkuâ xo.

Ing tơdroăng rak krá tơniăn hiâm mơno kuăn pơlê, tơkŭm châ hiâm mơno kuăn pơlê krá tơniăn, tung mê ai hnoăng ki kơnâ kal khât dêi khu lêng kuăn pơlê ƀă a peăng hdroh cho dêi khu lêng tơleăng lĕm ƀă  khu lêng gâk kring peăng hdroh, Trung tươ̆ng Trần Vi Dân tối rơdêi, túa xo vế ki rơkê tơtro ‘’rak hiâm mơno kuăn pơlê ƀă mơjiâng tơdroăng gâk kring tung hiâm mơno kuăn pơlê ối ai ki kơnâ’’ tung hneăng kăch măng nôkố:

“Ngin hlo túa hriâm rơkê ‘na rak krá hiâm mơno kuăn pơlê ƀă  mơjiâng tơdroăng gâk kring tung hiâm mơno kuăn pơlê ối kơnâ. Ƀă gá pơtối po ăm pin mâu tơdroăng pơkâ tung tơdroăng mơhnhôk thế, mơhnhôk vâ kuăn pơlê môi tuăn, loi tơngah ƀă troăng hơlâ, troăng prôk dêi Đảng, troăng hơlâ, luât dêi Tơnêi têa. Ƀă po tơkŭm, mơnhên troăng pơkuâ, hnê mơhno ƀă mâu troăng tơtro vâ mơjiâng hiâm mơno kuăn pơlê mơni vâ pin mơjiâng, gâk kring Tơnêi têa tung chal nếo, chal mơnhông mơdêk mơ-eăm xêh dêi hdroâng mơngế Việt Nam’’.

Thươ̆ng tươ̆ng Trịnh Văn Quyết, Kăn pơkuâ hnê ngăn cheăng Đảng Tơnêi têa, Kăn cheăng pơkuâ tơdroăng cheăng Đảng kơvâ cheăng lêng Tơnêi têa, Kăn pơkuâ Kơ koan xiâm Kal kí Khu lêng kuăn pơlê Việt Nam, tung xông tơpui tâi tâng tham luâ̆n a Hôp tơpui tơno ‘’Ƀlêi trâng rơnó Hơngui 1975 ƀă Chal mơnhông nếo dêi hdroâng mơngế Việt Nam’’, tơkŭm po kơxo lơ 19/4 pơla kố nah mơnhên: Ƀlêi trâng dêi roh Xông tơplâ xâ ƀă xông plâ Hơngui 1975 cho môi tung mâu tơdroăng ki khên tơno ƀă rơdêi má môi tung tơdroăng roh ton nah mơjiâng ƀă rak tơnêi têa dêi hdroâng mơngế Việt Nam. Mê cho ƀlêi trâng dêi tơdroăng khên tơnôu ƀă tuăn ngôa rơkê Việt Nam, cho tơdroăng ki chiâng dêi khôi túa lĕm pâ nhuô̆m tơnêi têa tơrŭm krá tơniăn ƀă tơdroăng môi tuăn tơnêi têa ƀă pói vâ hơniâp lĕm, tơkŭm ivá rơdêi tơdroăng tơrŭm môi tuăn tâi tâng hdroâng mơngế ƀă ivá ó rơdêi rơxông ƀă tơrŭm lâp plâi tơnêi.

Ƀlêi trâng rơnó Hơngui 1975 ối cho ƀlêi trâng ki má môi dêi tơdroăng tơleăng lĕm hdroâng mơngế chal XX, kum kal khât tung roh tơplâ xâ dêi kuăn mơngế xua pơkâ xiâm tơniăn krê, hơniâp lĕm, kuăn pơlê pơkuâ dêi hnoăng ƀă rơkê pơlê pơla; mơhnhôk thế mâu hdroâng mơngế tro ‘nêk mơ’nêa mơdêk tơdroăng xông tơplâ, po ăm tơdroăng ‘nhê tơmeăm dêi chuh ngiah thưk yân nếo tung lâp plâi tơnêi. Thươ̆ng tươ̆ng Trịnh Văn Quyết tối rơdêi:

‘’Pêi pro rơkong kơbông krếo dêi Đảng ƀă Pôa Hồ Chí Minh, Kăn xiâm hnê ngăn Tơnêi têa hneăng apoăng, tâi tâng hdroâng mơngế Việt Nam tơdjêp chiâng môi khu krá tơniăn, môi tuăn tá ‘na hlê plĕng, tơdroăng ki khŏm mơ-eăm ƀă tơdroăng pêi pro; tơrŭm môi tuăn tung Đảng, tơrŭm môi tuăn tâi tâng kuăn pơlê, tâi tâng khu lêng, tơrŭm Peăng Kơnhŏng – Peăng Hdroh, tơrŭm mâu khu pâ nhuô̆m tơnêi têa ƀă tơdroăng ki rơkê, tơrŭm môi tuăn lâp plâi tơnêi…Kơnôm mê, tâi tâng Đảng, tâi tâng khu lêng ƀă tâi tâng kuăn pơlê pin a péa kơpong Peăng Hdroh – Peăng Kơnhŏng hiăng chôa ‘lâng tơkâ hluâ pá puât, hbrâ tơplâ ƀă hlâ tung tơplâ xâ, chôa ‘lâng plâ ƀlêi trâng mâu troăng pêi, pêi pro hlĕng tơplâ dêi đê̆ kuô̆k Mih ƀă Khu râ kăn ki kum parŏng’’.

Ƀlêi trâng rơnó Hơngui 1975 troh tá ah cho môi kơlo ki eăng tung tơdroăng roh ton nah tơplâ xâ mơjiâng tơnêi têa ƀă rak tơnêi têa dêi hdroâng mơngế Việt Nam tối tơdjuôm, tơdroăng roh ton nah tơplâ kăch măng Việt Nam tối krê. Mâu ki kơnâ tơdroăng roh ton nah, mâu túa hriâm ki rơkê tơtro ing ƀlêi trâng rơnó Hơngui 1975 hiăng, dế ƀă kô châ mâu rơxông pơtối pơtối mơnhông, pro troăng prôk krá tơniăn vâ tâi tâng hdroâng mơngế mot tung chal nếo.