Tung hneăng pơla hdrối nah,tơdroăng tơkêa 8 ối tung tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă kong ngo châ mơnhên tối cho môi “hvêa prôk ki tơƀrê” drêng ai liăn ngân ƀă tơdroăng cheăng krê gum ăm mơdêk pro tơdâng tơ’mô. Laga, tiô Tiê̆n sih Phạm Thái Hưng – ngế ki rơkê tiâ mơnhên troăng hơlâ, ivá mơeăm kố xuân tá hâi “tŭm”. Pôa tối leăng, Tơdroăng tơkêa 8 nôkố bu châ dâng 1,4% tung tâi tâng liăn ngân dêi tơdroăng, tung mê ai mâu tơdroăng tơkêa ƀă tơdroăng tơkêa bro kŭn ki ê. Kơlo liăn xoăng môi tiah mê gá iâ vâ pêi mâu tơdroăng cheăng ki kân. Tiê̆n sih Hưng tối nhên: “ ki xiâm tá hâi châ tơtrŏng lơ tá hâi nhên ‘na tơdroăng tŏng gum”.

Tơdroăng kố pơkâ mơ’no môi tơdroăng ki pơloăng kân, xua tâng bu tơkôm tung môi tơdroăng tơkêa ‘ngré ƀă kơxô̆ liăn pro iâ, mê tơdroăng mơnhông pro tơdâng tơ’mô kơnốu ƀă kơdrâi a kơpong hdroâng kuăn ngo ƀă kong ngo pá vâ châ tiô tơdroăng tưƀrê môi tiah tơdroăng púi vâ. Hlo tơdroăng ki ai khât kố, Tiê̆n sih Phạm Thái Hưng tối tiah kố kal ai tơdroăng pơhlêh túa ki châ xúa túa pêi, mê xơpá to lâi xuân pêi tơƀrê tiô tơdroăng pơkâ mơ’no tung tơdroăng cheăng pro tơdâng tơ’mô kơnốu ƀă kơdrâi. Pôa pơkâ thế: Tơdroăng pro tơdâng pơla kơnốu ƀă kơdrâi tung tâi tâng mâu tơdroăng tơkêa bro, mâu tơdroăng bro ki kŭn ƀă mâu tơdroăng ki kal chiâng dêi tơdroăng. Tiô pôa, kố ôh ti xê cho hnoăng cheăng pôu râng krê dêi Tíu xiâm ngăn vâi kơdrâi Việt Nam lơ dêi tơdroăng Tơkêa 8, mê athế cho hnoăng cheăng pêi đi đo, athế “mot hngế tung tơrêm mâu kơxô̆ liăn, tơrêm tung tơdroăng cheăng” dêi tâi tâng tơdroăng.

Vâ tơdroăng tŏng gum kơnốu ƀă kơdrâi ôh ti xê pơtê a troăng hơlâ pêi kố lơ tơdroăng pơkâ, Tiê̆n sih Phạm Thái Hưng pơkâ thế ai troăng hnê mơhno nhên ing mâu khu xiâm, kơvâ cheăng pơkuâ pêi pro tơdroăng tơkêa, tơdroăng tơkêa bro ki kŭn, ƀă tơdroăng xing xoăng tơdjuôm dêi Ƀơrô cheăng Xing xoăng Tơdroăng. Pôa tối nhên tiah kố, kal pơhlêh nếo túa tơbleăng tiô tơdroăng ki ai pơxúa khât ƀă tro ƀă tơdroăng ki ai khât.

“vêh mơnhên kong pơlê ƀă tơdroăng ki kơjo gum. Ƀă mâu tơdroăng cheăng môi tiah mơdêk ivá ƀă tơbleăng tung rơ’jiu, um tơvi, kal pơhlêh troăng sap ing châ xúa tiô kong pơlê ki malối xơpá chiâng châ xúa tiô mâu ngế ki kal châ tŏng gum; Mơdêk tơƀrê tơbleăng tối tung um tơvi. Kal mơdêk ƀă mơdêk pơhlêh kơxô̆, la ki kal tâ cho athế rak tơniăn liăn ngân ăm mâu tôh tơbleăng tối ăm pơlê pơla”.

Ki khât gá nôkố, a hên tíu, pin ai mơjiâng mâu tôh pro um, roê mâu loâ tơpui mơ’no rơ’jiu ƀă hên ki ê la tá hâi tơƀrê khât. Xiâm kối cho xua tá hâi ai tŭm liăn ngân vâ râ vế ƀă xúa. Tiê̆n sih Phạm Thái Hưng xuân mơhno nhên Khu xiâm ngăn liăn ngân tá hâi ăm kơxô̆ liăn kố tung Tơdroăng pơkâ 55, pro mâu kong pơlê ôh ti ai liăn vâ tơbleăng pro, malối cho a kơpong hngế hngo. Ôh pơtê to a mê, pôa ối mơhno tơ’nôm mâu tơdroăng ki ôh tá tơniăn tung hnoăng cheăng hnê hriâm:

“Cheăng hnê hriâm ‘na tơdâng tơmô pơla kơnốu ƀă kơdrâi nôkố dế trâm tơdroăng rế rơlối, rế ôh tá tŭm; rơlối mâu tơdroăng kal krâ ‘măn, túa pêi; ối kal mâu tơdroăng ki rơkê plĕng tung tơdroăng ai khât, mâu túa pêi ki rơkê plĕng. Kal pơhlêh chiâng mơdêk ivá tiô pơla pơhlêh ƀă mâu tơdroăng hnê hriâm môi ngế, iâ, vâ hbrâ rơnáu ăm khu kăn ƀô̆ rêm râ mâu tơdroăng tŏng gum tơƀrê tung tơdroăng cheăng rêm hâi”.

‘Na tơdroăng ki kal mâu tơdroăng kal châ kơjo tung la ngiâ, pakĭng tơbleăng pêi tơƀrê mâu tơdroăng rak ngăn ivá ăm mâu nôu, kuăn ‘nĕng tung mơhum kuăn, Tiê̆n sih Phạm Thái Hưng pơkâ thế po rơdâ tơ’nôm ăm vâi kơdrâi ƀă vâi hdrêng. Tiô pôa, kố cho tơdroăng ki kal, tơdjâk tơdrêng troh ivá ƀă ki rơkê plĕng tung rêh ối dêi khu ngế ki xơpá kố, la ki khât nôkố xuân ối cho môi tơdroăng pơloăng mơnúa kân a hên kong pơlê peăng kong ngo, kơpong hngế hngo.

Vâ mâu tơdroăng thế châ vâ xúa tung tơdroăng ai khât, Tiê̆n sih Phạm Thái Hưng  krếo thế Tíu xiâm Khu ngăn vâi kơdrâi việt Nam kal hbrâ rơnáu tơrŭm krá ƀă Bơrô cheăng tơdroăng pơkâ tơnêi têa ƀă mâu khu xiâm, kơvâ cheăng ki tơdjâk, vâ rak vế mâu tơdroăng ki kal châ tŏng gum tiô túa ki tro ‘ló ƀă ki khât tung mâu tơdroăng tơkêa ƀă tơkŭm mâu tơdroăng nếo. Tâng ôh tá tŏng gum, mê kal rak vế môi khu cheăng krê, lơ chiâng vâ pơkâ tung tơkŭm mơnhông liăn ngân môi tiah môi troăng hơlâ ki tơtro ƀă tá hâi tơtro.