Pêi pro Pơkâ kơxô̆ 57 dêi Khu xiâm pơkuâ tơdroăng kal kí ‘na mơnhông tơƀrê mơjiâng khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ tơnêi têa, kơxo lơ 14/8, A leh tơbleăng, pôa Hồ Văn Mười, Kăn hnê ngăn Vi ƀan kong pơlê Lâm Đồng krếo thế tâi tâng kăn ƀô̆, kong chưk, viên chưk, ngế pêi cheăng ƀă tâi tâng kuăn pơlê tăng ‘nâi, veăng pêi tơdâng tơ’mô; hbrâ rơnáu; pêi pro kơtăng ƀă tơdroăng ki hnê kuăn pơlê xúa pơhlêh kơxô̆; mâu khu râ, kơvâ cheăng, kong pơlê tơmâng ngăn troh tơdroăng ki roê mâu kế tơmeăm, liăn ngân, séa ngăn tơdroăng hnê tơkŭm po lâm hnê kih năng kơxô̆ ăm tơtro ƀă rêm ngế ôh tá pơrah ngế ki lâi hơnăm hiăng tơkéa lâi tung pơlê pơla.

Klêi kơ’nâi leh tơbleăng tơdroăng hnê kuăn pơlê xúa ‘na pơhlêh kơxô̆, lối rơpâu ngế kăn ƀô̆, kong chưk, viên chưk, ngế pêi cheăng dêi kong pơlê Lâm Đồng châ tơbleăng tối, hnê hriâm xúa tơdroăng, kơmăi xúa tơdjuôm tung tơdroăng cheăng dêi kăn pơkuâ péa râ; xúa ngế kum gum cheăng ôh ti ai khât, Chat GPT, troăng hơlâ ôm hyô ki rơkê 4.0; tơbleăng mâu Kơmăi mơ’no tơdroăng kal ‘na tơnêi tơníu.