Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, kố cho rôh apoăng Kuô̆k hô̆i tơkŭm po rôh hôp. Pôa tối rơdêi tơdroăng séa ngăn hiăng châ Kăn xiâm hnê ngăn Hồ Chí Minh hnê mơhno pêi pro sap ing hơnăm 1946. Kăn xiâm hnê ngăn hnê ngăn Hồ Chí Minh xuân hiăng séa ngăn a mâu kong pơlê ki kal ‘na cheăng kâ, pơlê pơla, prôk achê ƀă kuăn pơlê, ối achê ƀă kuăn pơlê, vâ hlê kuăn pơlê. Kăn xiâm hnê ngăn Kuô̆k hô̆i mâu hneăng cheăng hdrối nah xuân hiăng tơtrŏng tơdroăng ki séa ngăn vâ mơjiâng pro ƀă rak vế Tơnêi têa. Ƀă séa ngăn nôkố cho vâ pro tơdroăng mơnhông tơnêi têa tung chal nếo, Chal ki mơeăm tơná dêi hdroâng mơngế.

Tung pơla hdrối kố nah, Kuô̆k hô̆i hneăng 15 vâ rơkê plĕng khât troh cheăng séa ngăn, hên rôh séa ngăn hiăng châ pêi pro kơtăng, hlo tơƀrê ƀă châ tơbleăng tơdrăng ăm Mâu kăn Kuô̆k hô̆i, kuăn pơlê. Tiah mê, cheăng mơjiâng, vâ pro klêi troăng hơlâ pơkâ ‘na cheăng séa ngăn châ tơmâng ngăn ƀă tơdroăng tơrŭm krá tơniăn, teăm tơdrêng pơla mâu kơ koan dêi Kuô̆k hô̆i, Chin phuh, dêi Vi ƀan xiâm Măt trâ̆n Tơnêi têa, Hngêi tơleăng kuăn pơlê, Viê̆n séa ngăn arak luât, kơ koan séa ngăn liăn ngân Tơnêi têa, kơ koan séa ngăn, mâu kơ koan hlá tơbeăng a Tơnêi têa ƀă kong pơlê.

Tiô Kăn xiâm hnê ngăn Kuô̆k hô̆i, cheăng tiâ mơnhên hiăng chiâng túa ki séa ngăn tơƀrê dêi Kuô̆k hô̆i. A mâu hneăng hôp Kuô̆k hô̆i pơrá ai cheăng êng ƀă tiâ mơnhên. Hô̆i đong hdroâng kuăn ngo, mâu Vi ƀan dêi Kuô̆k hô̆i ai mâu rôh tơpui tối leăng ‘na mâu tơdroăng ki kuăn pơlê kal vâ ‘nâi.

Tung pơla hdrối nah, Kuô̆k hô̆i đi đo rơtế prôk ƀă Chin phuh. Xua tơdroăng pơkuâ dêi Đảng, Đảng ƀă troăng hơlâ pơkâ tơtro, pơkâ tơmiât mơnhông cheăng kâ rêh ối pơlê pơla, rak vế tơniăn cheăng lêng, gâk kring. Tung tơdroăng mê, Chin phuh pơtroh Luât, tơdroăng Pơkâ vâ Vi ƀan pơkuâ Kuô̆k hô̆i, Kuô̆k hô̆i pơkâ mâu tơdroăng ‘na troăng hơlâ, mơjiâng luât, pơkâ mâu tơdroăng ki kal dêi tơnêi têa.

Kăn xiâm hnê ngăn Kuô̆k hô̆i ăm ‘nâi, a hneăng hôp ki achê kố, Kuô̆k hô̆i hneăng 15 hiăng pơkâ mâu luât, pơkâ mâu tơdroăng rơtế ƀă pơhlêh nếo tung Luât pơkâ mơéa luât, tung mê xoăng râ xoăng hnoăng pơkuâ rơdêi ăm Chin phuh ƀă kăn pơkuâ kong pơlê tiô hnê mơhno dêi pôa Tô Lâm, Kăn xiâm pơkuâ hnê ngăn cheăng Đảng ƀă túa pơkâ, kong pơlê pơkâ, kong pơlê pêi, kong pơlê pôu râng dêi hnoăng.

Pro tiah lâi vâ cheăng kăn pơkuâ kong pơlê péa râ châ tơniăn tiô tơdroăng pơkâ thế tung la ngiâ, vâ cheăng séa ngăn Kuô̆k hô̆i, Vi ƀan pơkuâ Kuô̆k hô̆i séa ngăn pêi cheăng tiô tơdroăng ki ai khât vâ séa ngăn luât, tơdroăng pơkâ, hlá mơéa pơkâ. Pơtih 1 hơnăm ai péa rôh hôp séa ngăn dêi Kuô̆k hô̆i, 2 rôh séa ngăn Vi ƀan pơkuâ Kuô̆k hô̆i. La ngiâ ah, pin kô pêi môi rôh séa ngăn dêi Kuô̆k hô̆i, la Vi ƀan pơkuâ Kuô̆k hô̆i athế séa ngăn hen rôh, đi đo, tá kơdrâ lăm séa ngăn vâ châ hlo mâu tơdroăng ki ôh tá tro ‘ló, vâ teăm tŏng gum xơpá”.

Kăn xiâm hnê ngăn Kuô̆k hô̆i ăm ‘nâi, Vi ƀan pơkuâ Kuô̆k hô̆i kô pơtối tơmâng xo mâu rơkong tơpui tối dêi mâu kăn Kuô̆k hô̆i, vâ la ngiâ ah ‘mâi pơhlêh Luât pêi cheăng séa ngăn dêi Kuô̆k hô̆i ƀă Hô̆i đong hnê ngăn kuăn pơlê pơtroh ăm Kuô̆k hô̆i ngăn, tơbleăng a Hneăng hôp má 10, Kuô̆k hô̆i hneăng 15 vâ rak tơniăn tŭm mâu pơkâ séa ngăn châ pêi pro kơtăng tung tơdroăng ki ai khât.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, pơkâ kơtăng tơdroăng tung ƀai pơchuât Rôh hôp pơxiâm po Hneăng hôp má 8, Kuô̆k hô̆i hneăng 15, pôa Tô Lâm, Kăn xiâm pơkuâ hnê ngăn cheăng Đảng hiăng tối nhên: Kal rĕng hriăn ngăn tối nhên túa pơkâ séa ngăn khât dêi Kuô̆k hô̆i tro ƀă tơdroăng ki ai khât, ví bô bối ƀă mâu tơdroăng cheăng dêi mâu kơ koan Tơnêi têa ki ê pro mơhrê liăn ngân tê kơtê. Pơtối mơdêk ki rơkê tung cheăng tiâ mơnhên, tơpui tối leăng, séa ngăn mơéa chêh ‘na luât; tơtrŏng séa ngăn, séa ngăn, pơkâ kơtăng tơdroăng ki pêi pro mâu rơkong pâ thế klêi kơ’nâi séa ngăn. Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố:

Rôh hôp châ tơdah xo hên mâu rơkong tơpui tối dêi mâu khu ki ai hiâm mơno rơkê plĕng, kơhnâ rơkê, pôu râng ƀă mâu rơkong ki tơpui tối dêi mâu kăn Kuô̆k hô̆i, mâu khu ki rơkê, khu ki hriăn ‘na khoa hok, khu ki hriăn plĕng, veăng tơpui tối tung tơdroăng vâ chêh pro klêi troăng hơlâ ki ai tơdjâk troh cheăng séa ngăn tung hneăng pêi cheăng nếo dêi tơnêi têa, veăng gum mơnhông cheăng kâ rêh ối pơlê pơla, rak vế gâk kring pơlê pơla cheăm bêng, mơjiâng khu pơkuâ tơdroăng kal kí krúa, rơdêi, hbrâ mơdât kâ kơluâ, kâ kơhveăm liăn ngân”.