Kố cho pơkâ dêi khu râ kăn pơkuâ kong pơlê Dak Lak a Roh tơpui tơno leh tơbâ 70 hơnăm hâi miâng kơvâ pơkuâ tơnêi têa ‘na loi tĭng tiô khôp xua Khu pơkuâ hdroâng mơngế ƀă Loi tĭng tiô khôp kong pơlê Dak Lak tơkŭm po.

Kong pơlê Dak Lak nôkố ai lối 3,3 rơtuh pơ’leăng mâ kuăn pơlê, tung mê ai lối 720.000 kuăn khôp ƀă vâ chê 4.000 ƀok xối, yah  chĭng, ƀok moan; lối 270 rơpâu ngế cho hdroâng kuăn ngo. Lâp kong pơlê ai lối 700 tíu loi tĭng tiô khôp; 1.300 tíu khôp ƀă tíu khu tơkŭm kuăn khôp. Mơnhên tơdroăng tiô khôp cho tơdroăng kal vâ hiêm mơno dêi mâu kuăn pơlê, dế ƀă kô rêh rơtế hdroâng mơngế, pôa Nguyễn Thiên Văn, Phŏ Kăn hnê ngăn Vi ƀan kong pơlê Dak Lak pơkâ Khu pơkuâ hdroâng mơngế ƀă Tơdroăng loi tĭng tiô khôp pơtối pêi lĕm tro tơdroăng tơbleăng khu râ kăn pơkuâ hnê ngăn Đảng, khu râ kăn pơkuâ mâu râ tung pơkuâ, hnê mơhno pêi pro troăng hơlâ tiô khôp dêi Đảng ƀă Tơnêi têa, ki rơhêng vâ tối cho Luât loi tĭng tiô khôp; pro krá tơniăn ƀă tơmâng hnê tơ’nôm khu mơngế pêi tơdroăng loi tĭng, tiô khôp, tơleăng tơdroăng tơdroăng hdroâng kuăn ngo, tiô khôp ing tíu xiâm rêi pơlê pơla.