Tơdroăng tơkêa bro ‘no liăn mơjiâng tơmeăm khoăng troăng kân tơdrăng Bảo Lộc - Liên khương ki tơkâ luâ 10 to cheăm, bêng dêi kong pơlê Lâm Đồng, tơdjâk troh lối 5.400 rơpŏng kuăn pơlê ƀă 14 khu pêi cheăng, ƀă tâi tâng tơnêi kal xo tơvêh vâ chê 600 ha, tung mê ai tơnêi ối, tơnêi pêi chiâk, tơnêi kong, tơnêi mố đô̆i.

Châ mơjiâng pro a hâi lơ 29/6, tung péa rôh pơtó pro kăn pơkuâ dêi kong pơlê péa râ ƀă pêi tơdroăng tơ’mot kong pơlê, tơdroăng tơkêa bro ki  ối tơvâ tơvân. A cheăm Ninh Gia, tíu ki ai lối 100 rơpŏng kuăn pơlê tro tơdjâk xua tơdroăng tơkêa bro, pôa Võ Hữu Xuân, kăn hnê ngăn Vi ban Kuăn pơlê cheăm ăm ‘nâi, xơpá apoăng ki cheăm trâm cho iâ mơngế kăn ƀô̆ pêi cheăng, tá ai kăn ƀô̆ rơkê ‘na kơvâ cheăng ki mê vâ pêi tơdroăng cheăng chêl thiăn, ‘mâi xĕn tơnêi kơdrum deăng hngêi trăng:

“Tơdroăng xoăng mâu kăn pêi cheăng tro kơvâ cheăng pêi dêi Ƀơrô ngăn Cheăng kâ xing xoăng ôh tá tro, ôh tá tơ’mô mâu ngoh o ki nếo xo pêi tơdroăng cheăng. Tung pơla tăng ‘nâi plĕng vâ tơbleăng pêi tơdroăng pơkâ xuân môi tiah ‘na yă tơnêi ối pá. Nôkố tơvâ tơdroăng pơkâ hdró tơdjuôm dêi mâu cheăm mê hâi chiâng tơbleăng pêi pơtối vâ mơjiâng pro tơdroăng tơkêa bro kơpong pro pơlê nếo”.

Tiô pôa Nguyễn Thanh Chương, teăng mâ Khu Rak ngăn tơdroăng tơkêa bro ‘no liăn mơjiâng pro tơmeăm khoăng dêi kong pơlê Lâm Đồng, klêi lối 1 khế  pêi tơdroăng tơkêa bro châ mơjiâng pro, xuân ai lối 1 khế pêi cheăng dêi mâu kăn kong pơlê 2 râ, mâu tơdroăng pơkâ tơdjâk troh chêl thiăn liăn ‘mâi xĕn tơnêi tíu kơdrum deăng hngêi trăng xuân hâi châ pêi ngăn; tơnêi tíu ki xoăng a tíu ai tơdroăng tơkêa bro tơkâ luâ tro pơ’lêh; pá tơdroăng mơnhên yă tơnêi ăm inhên, mơjiâng troăng hơlâ chêl thiăn, mâu kơpong pro pơlê nếo... xuân hrá.

Pôa Nguyễn Thanh Chương ăm ‘nâi, tơdrêng ƀă tah ki tơvâ tơvân tro noăng chăng pêi dêi kong pơlê, kong pơlê Lâm Đồng xuân dế pâ thế Tíu xiâm pêi ahdrối pơtối rak luât pơkâ ki kal ‘na tơmeăm khoăng tung kơdâm tơnêi vâ tơniăn tung mơjiâng pro troăng kân tơdrăng Bảo Lộc - Liên Khương:

“A troăng kân Bảo Lộc - Liên Khương hiăng pơkâ hdró 11 tíu ai tơmeăm khoăng tung kơdâm tơnêi, tung mê ai 4 tíu tơnêi ki thế kơđu, 1 tíu tơnêi prêi ƀă 6 tíu tơnêi ƀă hmốu vâ tơbleăng pro ăm tơdroăng tơkêa bro. 11 tíu tơnêi tơmeăm khoăng mê ai chêh ‘mot tung Pơkâ 106 dêi Kuô̆k hô̆i ‘na mơnúa luât pơkâ ki kal ăm mâu tơdroăng tơkêa bro. Pơkâ 106 mê xêt troh hâi lơ 30/6, Vi ƀan Kuăn pơlê dêi kong pơlê Lâm Đồng ai pâ thế ƀă Chin phuh ƀă Kuô̆k hô̆i ăm  phêp pơtối pro mơdon Pơkâ 106 kô rĕng tâ pêi pro tiô Luât tơmeăm khoăng tung kơdâm tơnêi”.  

Tiô pơkâ dêi kong pơlê Lâm Đồng, tung pơla pro troăng kân tơdrăng Bảo Lộc - Liên Khương ai 30 khế. Vâ tơniăn tơdroăng pơkâ pêi, kăn hnê ngăn Vi ƀan Kuăn pơlê dêi kong pơlê Lâm Đồng đi đo lăm séa ngăn, tăng ngăn, hnê mơhno tah ki pá tơvâ tơvân ăm tơdroăng tơkêa bro. Pakĭng mê, ăm hên mâu kăn ƀô̆ pêi cheăng ‘na kơvâ ki mê râ kong pơlê chu troh veăng hnê ăm cheăm pêi; thâ rĕng mợiâng Khu rak ngăn tơdroăng tơkêa bro Troăng kân kong pơlê; Tíu xiâm ngăn Mơnhông tơƀrê tơnêi ‘măn dêi kong pơlê; Khu Rak ngăn tơdroăng tơkêa bro Pêi chiâk dêi kong pơlê... vâ pêi mâu tơdroăng kal ‘na kơvâ cheăng. Pôa Hồ Văn Mười, Phŏ kăn hnê ngăn Tỉnh ủy, Kăn hnê ngăn Vi ƀan Kuăn pơlê dêi kong pơlê Lâm Đồng, ăm ‘nâi, ƀă mâu tơdroăng tơkêa bro ki kal dêi kong pơlê, tung mê ai tơdroăng tơkêa bro troăng kân tơdrăng Bảo Lộc - Liên Khương, chêl thiăn liăn ‘mâi xĕn tơnêi tíu hngêi trăng châ ngăn cho troăng hơlâ ki xiâm thế pêi:       

“Ngin đi đo tô tuăn tơdroăng kố. Troăng hơlâ mê cho hnê tối, mơhnhôk kuăn pơlê tối ăm kuăn pơlê hlê mâu tơmeăm khoăng mơjiâng pro ki kal, mâu troăng kân tơdrăng lĕm mê kô pro pơxúa ăm kuăn pơlê drêng chêl thiăn liăn xua ‘mâi xĕn, thế pêi tơtro ‘ló tơdroăng. Ngin hiăng pâ thế kăn hnê ngăn Tỉnh ủy ăm mơjiâng Khu Hnê mơhno tơpui mơnhên mâu tơmeăm khoăng pro ki kal, tung mê ai mơjiâng Khu Hnê mơhno ‘mâi xĕn tơnêi tíu hngêi trăng kơdrum deăng ƀă pâ thế Kăn hnê ngăn Tỉnh ủy kô cho Ngế pơkuâ khu kố ƀă kô pâ thế mâu kăn tung khu pơkuâ tỉnh ủy, mâu vâi pú tỉnh ủy viên ing tơdroăng cho rêm ngế thế pôu râng hnoăng cheăng tí tăng ngăn, tơ’mot tơdjuôm hnê mơhno tơdroăng cheăng ‘mâi xĕn tơnêi tíu kơdrum deăng”.

Tơkâ luâ xơpá, tơvâ tơvân tung pơla pơtối, pơkuâ mâu pêi cheăng dêi mâu kăn kong pơlê 2 râ, kong pơlê Lâm Đồng dế tơkŭm tah ki pá tơvâ tơvân ăm mâu tơmeăm khoăng ki pro, tơdroăng tơkêa bro ki kal mơnhông cheăng kâ - pơlê pơla xông tơƀrê. Krê ƀă Tơdroăng tơkêa bro ‘no liăn mơjiâng pro troăng kân tơdrăng Bảo Lộc - Liên Khương, mâu tíu pêi cheăng, kơvâ cheăng dêi kong pơlê ƀă 10 to cheăm, bêng tíu ki a troăng kân tơdrăng tơkâ luâ dế tơkŭm pêi vâ rĕng klêi tơdroăng thiêl thiăn ‘măn xĕn tơnêi tíu kơdrum deăng hngêi trăng. Teăng mâ Khu pơkâ ‘no liăn pro troăng kân tơdrăng Bảo Lộc - Liên Khương ăm ‘nâi, troh khế 10 kố ah, kô pêi klêi tơdroăng hrik tăng ƀom mìn. Rơdroăng tí tăng ngăn vế hdró, rah xo khu ‘no liăn mơjiâng pro kô pê klêi a khế 11 ƀă pơxiâm tơbleăn pêi pro troăng kân tơdrăng mê./.