Pôa Tô Lâm, Kăn xiâm pơkuâ hnê ngăn Đảng tối mơnê ƀă  ía khât kơ mâu ngế ki hiăng hlâ xua tơplâ, pleăng hnoăng tơná ăm tơniăn lĕm hdroâng mơngế. Kăn xiâm pơkuâ hnê ngăn Đảng tối nhên, Đảng, Tơnêi têa ƀă Kuăn pơlê đi đo ngăn mơngế ai hnoăng mê cho tơmeăm ki kơnía git dêi hdroâng mơngế, cho kế ki pơtih tĭng dêi hiâm mơno pâ nhoăm tơnêi têa tơdroăng pêi pro ki lĕm dêi Việt Nam.

Tơdroăng “Pâ mơnê mâu ai hnoăng”, “Ai tơdroăng niân tiah kố kơnôm ai hnoăng vâi krâ nah” ôh tá xê to luât pơkâ kân mê ối cho hnoăng cheăng pêi kal kí ƀă cho tơdroăng pêi pro ki lĕm khât. Kăn xiâm pơkuâ hnê ngăn Đảng pơkâ thế Tíu xiâm pơtối tơrŭm ƀă mâu kơ koan, khu râ pơkuâ cheăng vâ teăm tơdrêng, tŭm tơdroăng tŏng gum, luât pơkâ tŏng gum ƀă mâu ngế ai hnoăng tơnêi têa, mâu tro rong, châi tamo tiô luât hiăng pơkâ, veăng tơmâng tŏng gum khât tơdroăng rêh ối ăm tuăn ngôa châ tơniăn.