Tơdroăng kố tơkŭm lối 200 ngế kăn kong têa ê ƀă Việt Nam, mê cho kăn pơkuâ mâu grup, khu mơdró kâ ki kân lo ing 21 to kong têa cheăng kâ APEC. Hneăng hôp tơkŭm tơpui tơno mâu tơdroăng tung la ngiâ môi tiah: tê mơdró – ‘no liăn cheăng, cheăng kâ kơxô̆, pơhlêh kơxô̆ ngiât, liăn ngân krá ton, tíu ki tê mơdró, tuăn ngoâ rơkê xua kuăn mơngế pro, khăm pơlât rơkê ƀă hên ki ê.

Tơpui a rôh po hneăng hôp, Kăn xiâm hnê ngăn tơnêi têa mơnhên tối khât inâi tơpui tơno dêi hneăng hôp rôh kố, ƀă tối tiah kố, mê cho mâu tơdroăng ki châ kơjo kân tung la ngiâ mơnhông dêi Việt Nam troh hơnăm, 2030, troăng ngăn troh hơnăm 2045. Kăn xiâm hnê ngăn tơnêi têa tối nhên, Việt Nam dế mơdêk rơdêi túa pơhlêh troăng tŏng gum, pêi pro klêi luât ƀă mơjiâng tơdroăng ‘no liăn cheăng tơdrăng, tơniăn, pro tơ’lêi hlâu ăm khu mơdró kâ tung tơnêi têa ƀă a kong têa ê.