Kơxê hâi lơ 19/8, pôa Vũ Hồng Thanh - Phŏ kăn hnê ngăn Kuô̆k hô̆i  rơtế ƀă mâu kăn lăm pêi cheăng dêi Vi ƀan Cheăng kâ ƀă liăn ngân Kuô̆k hô̆i pêi tơdroăng séa ngăn mâu tơdroăng tơkêa bro ki kal dêi tơnêi têa ƀă cheăng kâ pơlê pơla dêi kong pơlê Lâm Đồng. Tiô tối tơbleăng dêi Vi ƀan Kuăn pơlê kong pơlê Lâm Đồng, tung kong pơlê ai tơdroăng tơkêa bro troăng kân tơdrăng Peăng Kơnhŏng - troh peăng Hdroh ‘na mâ Hâi Lu, troăng pơla Gia Nghiã - Chơn Thành, xŏn lối 124km, tâi tâng kơxô̆ liăn ‘no lối 25.500 rơtal liăn, châ Kuô̆k hô̆i kĭ troăng hơlâ ‘no liăn ing mơ’nui khế 6/2024, la dế châ tơbleăng pêi hrá.

Troăng kân 27C xŏn lối 119km tơdjêp ƀă kong pơlê Lâm Đồng ƀă kong pơlê Khánh Hòa, ai ngo Khánh Lê xŏn lối 30km, cho tíu ki pá tung mơnhông ôm hyô, chơ tơmeăm dêi kong pơlê. Klêi tơ’kŭm mơnhên mâu tơdroăng tơvâ tơvân xo troăng hơlâ tơkâ luâ xơpá dêi kong pơlê Lâm Đồng, mâu ngế tung khu kăn séa ngăn dêi Vi ƀan cheăng kâ ƀă liăn ngân Kuô̆k hô̆i tối tơdroăng hbrâ, pêi kơtăng tung tơdroăng pơkuâ hnê ngăn; tối nhên mâu tơdroăng ki u ối, ki pá kal tơkŭm pêi mâu tơdroăng tơkâ luâ xơpá.

Pôa Vũ Hồng Thanh - Kăn xiâm hnê ngăn Kuô̆k hô̆i tối pơchân kong pơlê Lâm Đồng mơdêk tơdroăng pêi mâu tơmeăm khoăng, tơdroăng tơkêa bro ki kal; tơrŭm ƀă mâu khu ‘no liăn  pêi tiô troăng hơlâ tơkâ luâ xơpá tơvâ tơvân pro xiâm ki xông tơƀrê ing mâu tơdroăng tơkêa bro chiâ xo tơmeăm khoăng.