Kố cho rôh hôp ki apoăng klêi tơ’mot pái kong pơlê Dak Nông, Bình Thuận, Lâm Đồng chiâng kong pơlê Lâm Đồng ki nếo. Tơbleăng a rôh hop ăm hlo, 6 khế apoăng hơnăm kố, kong pơlê Lâm Đồng  hiăng pêi châ hên tơdroăng: GRDP tâk vâ chê 6%, tơmeăm mơdró kâ ôu tâk 7,9%, xo liăn ngân nâp ăm tơnêi têa  lối 16 rơpâu 8 rơtal liăn, tâk 19%, tê ăm kong têa ê lối 1,5 rơtal dollars.

Kong pơlê hiăng pê klêi péa tơmeăm khoăng ki kal châ tơ’mot ing peăng troăng kân Bắc -Nam ƀă troăng kân kĭng têa kơxĭ peăng Hdroh Phan Thiết, pakĭng mê, kô pê klêi tơdroăng têa tah hngêi pơtân hngêi xi kơchoh. Tơbleăng a rôh hôp kố, Kăn xiâm hnê ngăn Hô̆i đŏng kong pơlê - pôa Trần Hồng Thái tối nhên hên ki xơpá kal pêi pro tơkâ luâ tung la ngiâ: mê cho ki tâk hâi tơxâng ƀă tơmeăm khoăng ối hlâu, xo liăn ngân pêi cheăng hâi tơƀrê, ối iâ liăn ngân, rôh hôp tơkŭm tơpui tơno, pơkâ tơmeăm khoăng ai hlâu, xo liăn ngân ‘no mơjiâng tơmeăm khoăng tơnêi têa ôh tá rơhéa, tá tơƀrê.

Rôh hôp tơkŭm tơpui ‘na pơkâ mâu tơdroăng kal ‘na liăn ngân, luât pơkâ gum mâu kăn ƀô̆ klêi tơ’mot mâu kăn pêi cheăng pro rế lĕm ƀă troăng hơlâ mơnhông cheăng kâ rêh ối.