Pơkâ thế pêi pro tơƀrê hnoăng cheăng xiâm ‘na rak tơdâng pơla vâi kơdrâi-kơnốu a kơpong hdroâng kuăn ngo
Thứ tư, 05:00, 16/07/2025 Tơplôu: Nhat Lisa/VOV Tơplôu: Nhat Lisa/VOV
VOV.Xơ Đăng - Tung pơla mơnhông pêi cheăng kâ, pêi lo kế tơmeăm, tơdroăng rêh ối pơlê pơla a mâu kơpong hdroâng kuăn ngo ƀă kong ngo, tơdroăng ki rak tơdâng hnoăng pơla vâi kơdrâi-vâi kơnốu ôh tá xê to kring vế ‘na rêh ối dêi vâi kơdrâi ƀă vâi ‘nĕng, mê ối cho môi hnoăng cheăng ki kal gum ăm mâu kong pơlê, cheăm bêng châ mơnhông cheăng kâ krá tơniăn, ôh tá ăm ai ngế ki tro lôi pa rŏng. Tơdroăng pơkâ kơxô̆ 8, dó inâi “Rak vế, pêi pro ki tơdâng hnoăng pơla vâi kơdrâi-vâi kơnốu ƀă tăng po troăng hơlâ vâ pêi pro tơdrêng ‘na cheăng tŏng gum ăm vâi kơdrâi ƀă vâi ‘nĕng” cho môi tung mâu tơdroăng cheăng ki kal dêi Hnoăng cheăng Xiâm Tơnêi têa tung mơnhông pêi cheăng kâ-rêh ối pơlê pơla kơpong hdroâng kuăn ngo ƀă kong ngo.
Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Tung mâu khế hơnăm hdrối mê hía nah, tơdroăng Tơkêa bro kơxô̆ 8 hiăng pơtroh hên tơdroăng pơhlêh ki ai pơxúa khât ăm tơdroăng rêh ối dêi vâi kơdrâi ƀă vâi ‘nĕng a kơpong ki xahpá, hbrâ mơdât tơdroăng ki vâi ‘nĕng phô̆m vâ xông kân rĕng xo dêi pó, mơdât tơdroăng tơhôu tơhêng, tơpâm tơxiăn dêi rơpó tung on veăng ƀă hên mâu tơdroăng ki ê. Tung pơla pêi pro mê, Khu xiâm ngăn ‘na Vâi kơdrâi Việt Nam cho tíu ki xiâm pơkâ mâu hnoăng vâ pêi pro dêi tơdroăng Tơkêa bro kơxô̆ 8. Khu xiâm ngăn ‘na Vâi kơdrâi hiăng hbrâ rơnáu pêi pro dêi xêh, pôu râng hnoăng cheăng ƀă kơdo mơ-eăm kân khât, ing tơkŭm tơdjâ pêi troh a tơdroăng ki ăm mung liăn ngân. Kơnôm tiah mê, hên vâi kơdrâi kơtiê, vâi kơdrâi hdrốu, ôh ta ai kuăn cháu rak ngăn, vâi o kơdrâi ki rêh ối a pơlê cheăm kong hơngế, kong hơngo hiăng châ mung liăn tŏng gum, ing mê, kơdo mơ-eăm mơnhông tơdroăng rêh kâ ối.

Maluâ ti mê, pakĭng mâu tơdroăng ki hiăng châ chiâng pêi pro ki kơhnâ khât, tơdroăng ki pêi pro tiô Tơkêa bro kơxô̆ 8 xuân ối trâm hên mâu tơdroăng ki pá puât. Ai ối 200 kơlo kơxô̆ ki vâ tí tăng séa ngăn, tung mê, ai lối 70 kơlo kơxô̆ ki ai tơdjâk troh a tơdroăng pơla vâi kơdrâi-vâi kơnốu. Tiô pôa Phùng Quốc Huy, Phŏ Kăn Ƀơrô xing xoăng hnoăng cheăng dêi Khu xiâm pơkuâ hnê ngăn Đảng, ngăn ‘na kơvâ Cheăng xiâm Tơnêi têa tối, tơdroăng kố hiăng châ pơkâ nhên, rơhí rơhó, tơrêm túa cheăng, laga, ing mê, pro chiâng ai hên tơdroăng cheăng ki hngăm, tơpôu ăm mâu kăn ƀô̆ cheăm, kăn ƀô̆ tơring (hdrối nah), tíu ki mâu kăn ƀô̆ ki pơkuâ ngăn tơdroăng cheăng ‘na kơvâ ki rak tơdâng pơla vâi kơdrâi-vâi kơnốu, la kăn ƀô̆ ki ngăn ‘na kơvâ ki kố ga ối iâ păng ‘nâng. Ôh tá bê tŭm kuăn mơngế ƀă mâu tơmeăm, kơmăi kơmok ki vâ rah chêh xo tŭm têk mâu tơdroăng ki mê. Mâu kơmăi kơmok, kế tơmeăm ki tơdjâk troh kŏng ngê̆ thŏng tin a hên tíu tá hâi teăm tŭm, pro ăm tơdroăng ki vâ tơ’mot tơdroăng ki nếo ƀă tí tăng rah tơdroăng ki nếo ai mê ối trâm hên xahpá.

“Tung pơla mơjiâng hnoăng cheăng pêi, hên tơdroăng tơkêa bro ki ê pơrá ai chêh tối nhên “kơjo gum vâi kơdrâi”. Meluâ ti mê, pin nếo xiâm tot dâng tơdroăng ki mơhno tối troăng hơlâ ki tá hâi teăm nhên, ki tối “kơjo gum mê ga ti lâi”. Ing tơdroăng ki kố, pro pin ôh tá khoh chiâng pro ga chiâng môi tơdroăng ki nhên tung tơdroăng tơkêa bro mê, vâ pin vê ngăn ƀă tối mơnhên”.

Xua ti mê, vâ thăm mơdêk tơdroăng ki tơdâng pơla vâi kơdrâi-vâi kơnốu tung la ngiâ kố ah, kal ai troăng hơlâ ki nhên tâ. La ki ahdrối tâ, pơkal athế tơkŭm mơngế, kế tơmeăm pêi pro tiô mâu túa cheăng, pêi pro mâu hnoăng cheăng, ing mê, mơnhên tối ‘na tơdroăng ki pêi pro mê châ tơƀrê păng ‘nâng, ôh tá xê hmôu pa pro hên hĕng, la ôh tá rơhéa. Trối tơdroăng tiah kố, mâu túa cheăng ki vâ mơnhông rêh kâ ối ăm vâi kơdrâi hdrông kuăn ngo, mâu lâm ki hnê pơtâp ‘na tơdroăng rêh mê, tơdroăng pơtâng tối ‘na mơdât vâi o phô̆m xông kân thâ rĕng xo on veăng, ‘na tơdroăng ki kố ăm hlo hiăng châ tơƀrê nhên khât ƀă pơkal athế châ po rơdâ hên a mâu tíu ki ê.

Ki má péa, kal athế vêh séa mơnhên ngăn kơxô̆ liăn ki xing xoăng vâ pêi pro mâu hnoăng cheăng ki kố. Tâng tơrêm tíu, tơrêm khu pơrá châ xing xoăng liăn ngân phá, mê tơdroăng ki vâ chêh tối ƀă ăm mung liăn kô trâm ki tơvâ tơvân. Pôa Phùng Quốc Huy tối tiah kố, kal athế pơtối châ rak, châ ai kơxô̆ liăn ki krê ăm Khu ngăn vâi kơdrâi vâ pơkâ pêi pro mâu hnoăng cheăng ki xiâm, tiah mê, kô tơ’lêi tâ tung pơkuâ ngăn ƀă pơkâ pêi pro mâu tơdroăng ki păng ‘nâng. Pakĭng mê, kal athế pơcháu hnoăng cheăng ki pôu râng ăm cheăm, bêng, pơcháu tơ’nôm hnoăng cheăng ƀă kuăn mơngế cheăng vâ Khu kăn hnê ngăn cheăm, bêng hbrâ tăng troăng, po mơjjiâng xêh tơdroăng cheăng ăm i tơtro ƀă tơdroăng ki ai păng ‘nâng ƀă ki pói rơhêng vâ ki khât dêi tơrêm tíu.

“Pin kal athế kơdroh kơxô̆ liăn ki vâ pêi cheăng, kơxô̆ liăn ki mê ôh ta xê bu chôu ‘măn a Khu xiâm hnê ngăn, teăng amê cho tơdroăng ki pơcháu ăm tơdrăng a cheăm bêng. Xua cheăm bêng cho tíu ki ‘nâi nhên má môi tơdroăng rêh kâ ối, pêi cheăng dêi kuăn pơlê, pơcháu hnoăng ăm vâi kô gum pêi pro mâu tơdroăng cheăng tơtro ƀă ki ai păng ‘nâng, châ tơƀrê kân khât”.

Môi tơdroăng ki ê xuân kal athế ‘nâi plĕng, mê cho kơdo mơ-eăm tah lôi mâu khôi túa, vêa vong ki ôh pa tơtro xếo, trối tơdroăng ki vâi o phô̆m xông kân rĕng xo on veăng, lơ ƀă vâi o ki hiăng tro hơnăm, la ối achê môi jâ pôa, môi mơheăm chhá xo dêi pó ƀă hên mâu tơdroăng ki ê. Kố châ ngăn cho ki xiâm, ki trâu hơngế khoh pro mơdât tơdroăng ki mơnhông tơdroăng rêh ối dêi vâi kơdrâi ƀă vâi hdrêng hdroâng kuăn ngo. Tơdrêng ƀă tơdroăng mê, pơkal athế tơrŭm cheăng pơla mâu khu râ, kơvâ cheăng vâ mơdât tơdroăng ki tơvâ tơvân, tơdjâk troh hnoăng cheăng, tơdroăng ki vâ mơnhông tơƀrê dêi tơrêm kơvâ cheăng.

Tơdroăng ki mơnhông hnoăng cheăng, ki rơkê plĕng dêi vâi kơdrâi, păn roăng rak ngăn mâu vâi hdrêng, vâi ‘nĕng ôh ta xê to hnoăng cheăng ki păng ‘nâng, mê ối cho tơdroăng ki vâ mơ’no liăn ngân ăm tơdroăng rêh ối la ngiâ. Tung hneăng la ngiâ, tơdroăng ki rak tơdâng pơla vâi kơdrâi-vâi kơnốu kal athế châ pêi pro ki păng ‘nâng tâ; tơkéa vâ tối, mê kal athế ai hnoăng cheăng ki xiâm dêi khu kăn hnê ngăn cheăm bêng. Ai ti mê ‘nôi, pin nếo păng ‘nâng ai ki pơhlêh khât, krá tơniăn ăm tơdroăng rêh ối dêi vâi kơdrâi ƀă vâi ‘nĕng a pơlê cheăm kơpong hơngế hơngo, kơpong hdroâng kuăn ngo, ing mê, veăng gum rak vế, pêi pro châ ƀlêi chiâng Hnoăng cheăng xiâm Tơnêi têa ‘na tơdâng pơla vâi kơdrâi-vâi kơnốu ing nôkố troh a hơnăm 2030.

Tơplôu: Nhat Lisa/VOV

Viết bình luận

TIN CÙNG CHUYÊN MỤC

Video

Bi mni kơ Awa Hô
Đơs git oh, git bi
06/05/2025
Jreng Jrong
30/03/2024
Tanh bĕ dra hiam
22/03/2024