A rôh trâm mâ, mâu kăn cho Khu lêng Kring vế peăng kuăn pơlê, mâu mố đô̆i hneăng hdrối, droh rơtăm djâ troăng ahdrối hiăng tối mâu tơdroăng ki ƀriê ‘na rôh tơplâ, mơhno hiâm mơno tơƀrê, ivá khên tơnôu ƀă hiâm mơno tơdrăng khât ƀă tơdroăng cheăng kăch măng dêi Đảng, dêi hdroâng mơngế. Mâu kăn xuân tối tơdroăng ki loi ƀă púi vâ pơtối veăng gum ivá, tuăn ngoâ tung tơdroăng cheăng mơjiâng, rak vế Tơnêi têa tung hneăng mơnhông nếo.

Tơpui a rôh trâm mâ, pôa Tô Lâm, Kăn xiâm pơkuâ hnê ngăn cheăng Đảng tối rơdêi tơdroăng ton nah kăch măng Việt Nam đi đo chôu vế hnoăng cheăng kân kĭn dêi mâu ngế ki tơplâ a mâu tíu tơplâ. Kăn xiâm pơkuâ hnê ngăn cheăng Đảng tối tơbleăng ăm mâu kăn ‘na mâu troăng pơkâ kân kô châ tơbleăng tung hneăng la ngia, tơkŭm tung pái hnoăng cheăng: rak vế tơdroăng ki hơniâp lĕm, tơniăn; mơnhông cheăng kâ rêh ối pơlê pơla rĕng, krá tơniăn; mơdêk tơdroăng rêh ối kuăn pơlê, malối cho mơngế kơtiê, rak vế tơdroăng ki pôi tá lôi kơbố ki lâi pa rŏng.