Kơmăng lơ 6/4, lối 1.500 kăn teăng mâ ƀă rơpâu ngế kuăn pơlê kong pơlê Dak Lak hiăng rơtế châ ngăn tơdrêng tơdroăng ngê̆ thuât chĭnh luâ̆n ‘’Tơdroăng rơhdruê xŏ hơniêp lĕm’’, leh tơbâ 50 hơnăm Tơleăng lĕm Peăng hdroh tơnêi têa, môi tuăn tơnêi têa.

Ƀă ki kơnâ mơhno dêi ƀlêi trâng Ƀuôn Ma Thuột, ƀlêi trâng pơxiâm po, mơjiâng tơdroăng ki pơhlêh kân ăm Ƀlêi trâng Rơnó hơngưi 1975, vâ chê 250 ngê̆ sih, mâu lêng, diên viên kuăn pơlê hiăng rơtế mơhno mâu tơdroăng ki chuôt khên tơnôu dêi tơdroăng Phiu ro Tây Nguyên tơleăng lĕm ƀă ƀeăn ƀĕng prôk troh a Sài Gòn. Nâ Nguyễn Thị Thúy Diễm, ối a bêng Tân An, pơlê kong kơdrâm Ƀuôn Ma Thuột tối:

‘’Tơdroăng kố cho po krip ƀă po kân. Rơpŏng á hâk vâ lăm ngăn tơdroăng kố, hlo lĕm ‘nâng ƀă rêm ngế cho kơdrâm phiu ro, lĕm krip’’.

Pakong séa ngăn tiô kơteăng chêng dêi khu tơleăng lĕm ing mâu tơdroăng chêh ki ai khât, mâu kăn teăng mâ ƀă mâu ki ngăn châ tâng mâu rơkong tơpui tối ki ai khât a tíu mơđah tơbleăng dêi Trŭng tươ̆ng, Ngế khên tơnôu khu lêng kuăn pơlê Đoàn Sinh Hưởng, cho Đăi đô̆i trương Đăi đô̆i 9, Trung đoân Tăng thiết giáp 273, ngế hiăng vê rơxế komƀa 980 plâ sư ƀô̆ 23 Việt Nam kŏng hoa a Ƀuôn Ma Thuột, mot hâi lơ 10/3/1975.

Rơxế komƀa 980, nôkố chiâng um mơhno ivá ó rơdêi tiô khôi vâi krâ nah, tung tíu um meăn Ƀlêi trâng Ƀuôn Ma Thuột, Trung tươ̆ng Đoàn Sinh Hưởng tối ăm ‘nâi, pôa rế hâk tơngăm xua tơdroăng roh ton nah 21 hơnăm tơplâ môi tuăn tơnêi têa, rế hâk tơngăm mâu tơdroăng châ tơƀrê hiăng châ tung tơdế chal hiăng hluâ:

‘’Á hâk tơngăm cho a hiăng châ veăng mâu roh tơplâ xâ ki kal môi tiah mê rơtế khu pú ƀă hiăng kêi đeăng hnoăng cheăng. Klêi 50 hơnăm ngiâ kố mê tơnêi têa á hiăng pơhlêh ƀă ki rơhêng vâ tối cho Ƀuôn Ma Thuột nôkố mê hiăng phá tơ-ê, kố cho môi tơdroăng hâk tơngăm’’.

A Hngêi trung lêng Quân khu 7 (pơlê kân 12, pơlê kong kân Hồ Chí Minh) xuân nếo tơkŭm po Tơdroăng ngê̆ thuât koh phiu ro leh tơbâ 50 hơnăm Hâi tơleăng lĕm peăng hdroh, môi tuăn tơnêi têa ƀă dó inâi ‘’50 hơnăm – Rơnó hơngưi Tơnêi têa’’. Tơdroăng hiăng mơhno châ tơdroăng ki kơvâ, râ kân, ki kơnâ tơdroăng ron ton nah dêi Hâi tơleăng lĕm peăng hdroh Tơnêi têa, môi tuăn tơnêi têa. Ing mê mơnhên tơdroăng pơkuâ rơkê dêi Đảng ƀă Pôa Hồ Chí Minh, Kăn xiâm hnê ngăn tơnêi têa hneăng apoăng; ivá ó rơdêi ƀă tơdroăng ki khŏm tơplâ, khŏm ƀlêi trâng dêi Khu lêng pin ƀă Kuăn pơlê Việt Nam, khu tơrŭm môi tuăn tâi tâng hdroâng mơngế. Tơdrêng amê pâ mơnê hnoăng dêi mâu khu lêng hiăng tơplâ xâ, hlâ, pro chiâng ƀlêi trâng kân; mơnhông hiêm mơno pâ nhuô̆m tơnêi têa, hâk tơngăm dêi kăn ƀô̆, mâu lêng, kuăn pơlê tung tơdroăng mơjiâng ƀă gâk kring tơnêi têa, mơjiâng tơnêi têa, mot tung chal xông mơ-eăm dêi hdroâng mơngế. Pôa Tô Văn Luận, kum cheăng hnê mơhno cheăng lêng dêi Ƀơrô tơbleăng pơkuâ tơnêi têa Hngêi trung lêng Quân khu 7 tối:

‘’Hâi lơ 30/4 la ngiâ djâ ki kơnâ tơdroăng roh ton nah kân kĭn dêi tâi tâng đảng, tâi tâng khu lêng, tâi tâng kuăn pơlê. Kăn ƀô̆ mâu lêng tung khu lêng dế mơ-eăm pêi pro mâu tơdroăng vâ leh tơbâ hâi ƀlêi trâng. Hngêi trung khu lêng Quân khu 7 xuân tơkŭm po hên tơdroăng, tung mê ai tơdroăng tơniăn ăm khu lêng veăng prôk pơtăng drô troăng kân tung leh tơbâ. Á xuân môi tiah mâu kăn ƀô̆, mâu lêng ƀă rơxông ối nếo mê ing mâu phim tư liê̆u xuân môi tiah châ hnê hriâm, tâi tâng rêm ngế pơrá hâk tơngăm ƀă ‘nâi mơnê rơxông pôa pâ prôk hdrối hiăng lo mơheăm chá xua tơniăn krê tơnêi têa’’.

Thươ̆ng ŭy Phạm Duy Hưng, Trung đô̆i trương Đăi đô̆i Kông ƀinh Khu xiâm pơkuâ lêng pơlê kong kân Hồ Chí Minh tối:

‘’Tâ rơrêk tung hiêm mơno drêng hiăng vâ troh hâi leh kân dêi kuăn pơlê lâp tơnêi têa tối tơdjuôm, pơlê kong kân Hồ Chí Minh tối krê, leh tơbâ 50 hơnăm tơleăng lĕm peăng hdroh tơnêi têa, môi tuăn tơnêi têa. Cho ‘’mô đô̆i Pôa Hồ’’ mê á hlo mâu hâi leh kố lâp tơnêi têa pơrá tơmiêt ‘na pơlê kong kân, hnoăng cheăng dêi á thăm hên, rế lăm séa ngăn ăm mâu roh leh tơniăn tung tơdroăng tơkŭm po châ tơ’lêi hlâu, ôh tá lôi ai tơdroăng ki pro ôh tá tơniăn, mê cho hnoăng cheăng dêi nhŏng o mâu lêng công ƀinh pơlê kong kân’’.

Ing rơkong tối ing Trung tươ̆ng Đoàn Sinh Hưởng - ngế ki nah vê rơxế komƀa 980 mot plâ a đông lêng kong têa ê a Ƀuôn Ma Thuột,  troh nôkố tơdroăng ki tâ rơrêk hâk tơngăm dêi kuăn pơlê ƀă mâu lêng hơnăm ối nếo hâi kố, mâu tơdroăng ngê̆ thuât hiăng chiâng kông tơdjêp krih tơviah pơla tơdroăng roh ton nah ƀă nôkố. Hiêm mơno Mô đô̆i Pôa Hồ ôh tá xê to rêh troh tá ah tung tơdroăng tơplâ roh ton nah  mê ối troh lâp lu tung tơdroăng pâ nhuô̆m tơnêi têa, rêm tơdroăng pêi ki kal khât xua mơnhông dêi tơnêi têa hâi kố./.