A rôh hôp, Hô̆i đong kuăn pơlê dêi kong pơlê hiăng tơbleăng mâu tơdroăng kal dêi mâu kăn, mê cho: troăng hơlâ pro rế lĕm tíu pêi cheăng râ kong pơlê ƀă râ cheăm; ăm pơtê cheăng ƀă pôa Phạm Ngọc Nghị, Kăn hnê ngăn Vi ƀan kuăn pơlê dêi kong pơlê. Pakĭng mê, Hô̆i đong kuăn pơlê dêi kong pơlê xuân tơpui tơno mâu tơdroăng pơkâ ‘na liăn ngân, liăn ‘no mơjiâng tơmeăm khoăng tơnêi têa, pơhlêh xúa kong vâ pêi tơdroăng tơkêa pro chiâng rôh má 2 dêi troăng kân tơdrăng lĕm Khánh Hòa – Buôn Ma Thuột, ƀă mâu luât pơkâ kơjo kum xut tah hngêi pơtân, hngêi xi kơchoh tiô hnê mơhno dêi Ngế pro xiâm hnê ngăn Chin phuh.

Jâ Huỳnh Thị Chiến Hòa - Kăn hnê ngăn Hô̆i đong kuăn pơlê dêi kong pơlê tối nhên, rôh hôp ai hên tơdroăng kal pêi, tơdjâk kân troh khu kăn pêi cheăng tung Chin phuh ƀă tuăn tơmiât púi vâ dêi kăn ƀô̆, kuăn pơlê. Jâ pơkâ thế mâu kăn pơtối rak ki môi tuăn, hnoăng cheăng pêi vâ pơkâ pêi tơƀrê, tro tiô tơdroăng púi vâ dêi kuăn pơlê.