A roh trâm mâ ƀă pôa Thongsavanh Phomvihane, Ngế xiâm tơpui kâ kong têa Rusi, péa pâ môi tuăn pơtối tơrŭm krá tơniăn, tŏng gum dêi pó a mâu roh hôp tơpui tơno hên pâ, ki má lối cho tung ASEAN ƀă mâu troăng tơrŭm cheăng kơpong Mekong; môi tuăn troăng tơmiât pêi tơdjuôm dêi ASEAN ‘na mâu tơdroăng cheăng ton xŏn a kơpong, tung mê ai tơdroăng Biển Đông.

A roh trâm mâ ƀă Ngế xiâm tơpui kâ kong têa Siam Maris Sangiampongsa, pôa Bùi Thanh Sơn môi tuăn păng ‘nâng ƀă mơnhên tơdroăng môi tuăn mâu troăng tơmiât pêi rơkê tơdjêp ôm hyô tung kơpong ASEAN; mơdêk tơdjêp tung khu ACMECS; tơdrêng amê pơkâ thế Siam pơtối pro tơ’lêi hlâu ăm pơlê pơla mơngế Việt Nam a Siam.

A roh trâm mâ ƀă Ngế xiâm tơpui kâ ƀă Tơrŭm lâp plâi tơnêi Kul Prak Sokhonn, péa pâ môi tuăn pơtối tơrŭm krá tơniăn, xuân môi tiah mơdêk mâu khu xiâm, kơvâ cheăng ki ê mơnhông châ tơƀrê mâu troăng tơrŭm cheăng pơla péa pâ ki ai nôkố, mơdêk tơrŭm cheăng tâi tâng tung mâu kơvâ, tung mê tơtrŏng tơpui tơno khu ƀă trâm mâ khu râ kăn xiâm, tơdjêp hngêi trăng, troăng klông, tíu tê mơdró ngi kong têa ê, mơdêk tơrŭm tê mơdró, thăm trâm mâ kuăn pơlê, po rơdâ tơrŭm ôm hyô.