Tiô Viƀan kong pơlê Gia Lai, tung tơdế apoăng hơnăm 2025, tâi tâng tơmeăm tung kong pơlê (GRDP) châ kơlo tơtêk vâ chê 7,5%. Kố cho tơxâng mơhnhôk, ki má lối drêng kong pơlê pơla kố nah tơkâ hluâ tơdroăng tơkŭm chiâng môi kơ koan tơnêi têa, kal chô vâ tơniăn kơ koan pêi cheăng tơnêi têa ƀă troăng pơkuâ.

‘Na liăn ngân, tâi tâng xo hnoăng liăn ngân Tơnêi têa châ lối 13.600 rơtal liăn, tâk rơdêi tâng pơchông ƀă roh kố hơnăm hdrối. Tơtrŏng má môi, tơdroăng ki veăng tơpui tung kong pơlê Bình Định châ lối 10.000 rơtal liăn, tơdrêng amê Gia Lai ton châ 3.600 rơtal liăn. Pêi lo liăn tê tơmeăm ngi kong têa ê lâp kong pơlê châ vâ chê 1,7 rơtal dolar, tâk rơdêi. Krê kong pơlê Gia Lai (ton) pêi lo liăn tê ngi kong têa ê tâk châ péa xôh, ki hên cho kơnôm kơphế, mơjiâng ivá mơhnhôk kân ăm kơvâ pêi chiâk deăng.

Tơdroăng ki lĕm tro ăm Gia Lai nếo ối troh ing hên tơdroăng tơkêa bro kân môi tiah troăng kân ăm phêp rơxế kơtâu têi Quy Nhơn – Pleiku, kơno tuk Phù Mỹ, ƀă troăng tơƀai vâ xông kơneăng kơxô̆ 2 tơraih tơƀai Phù Cát. Mâu tơmeăm kố ôh tá xê to ai hnoăng kal tung mơnhông cheăng kâ mê ối kum mơdêk ivá troăng klông, logistics, mơhnhôk mơ’no liăn cheăng tung tơnêi têa ƀă kong têa ê.

Laga, tiô pôa Hồ Quốc Dũng, Kăn pơkuâ hnê ngăn cheăng Đảng kong pơlê Gia Lai, kong pơlê klêi kơ’nâi tơmot chiâng môi xuân trâm hên pơloăng mơnúa, pá puât. Ki má môi tung mê cho troăng klông, rơchôa hno têa, khăm pơlât ƀă hnê hriâm xuân tá hâi tơdâng tơ’mô. Tơdroăng ki phá tơ-ê ‘na troăng pơkuâ pơla péa kong pơlê ton mơni tơdjâk troh ki châ tơƀrê pơkuâ dêi kong pơlê Gia Lai (nếo). Vâ tah lôi mâu pá puât kố, kong pơlê Gia Lai hiăng tơbleăng khu pơkâ nếo, xo troăng pêi ‘’Nhên mơngế - Nhên tơdroăng cheăng – Nhên tơmeăm – Nhên ki rơkê – Nhên hnoăng cheăng – Nhên hnoăng chiâng pêi’’ pro tíu ki mơhno troăng. Pơtối mê, túa pơkâ mơnhông cheăng kâ – rêh ối pơlê pơla châ pơcháu inhên troh rêm cheăm, bêng, ki rơhêng vâ tối kơjo mâu kơpong pá puât. Pôa Hồ Quốc Dũng tối rơdêi:

‘’Mơ-eăm khŏm pêi cho hơnăm thế tơtêk 8%. Séa ngăn tâi tâng pá puât tơvâ tơvân, mâu tơnêi ki rơlối vâ pêi. Kal pơhlêh nếo ó rơdêi troăng tơmiêt pêi cheăng kơ koan tơnêi têa ing troăng tơmiete pơkuâ troh khu râ kăn mơjiâng troăng pêi, kum ăm kuăn pơlê, tâi tâng mâu tơdroăng dêi kuăn pơlê ƀă khu tê mơdró cho thế tơleăng sap ing tíu pêi cheăng tơnêi têa. Xo ki châ tơƀrê tơdroăng cheăng ƀă tơdroăng môi tuăn dêi kuăn pơlê pro loăng rĕk ki vê ăm tơdroăng ki châ tơƀrê dêi tơná’’.

Viƀan kong pơlê Gia Lai hiăng pơkâ mâu troăng pêi inhên vâ pơhlêh ivá pơkuâ. Ki xiâm tung mê cho mơdêk xúa kŏng ngê̆ ƀă điên tưh tung pơkuâ. Mâu tơdroăng xiâm pơkuâ ƀă túa cheăng kâ – rêh ối pơlê pơla châ pơhlêh xúa kŏng ngê̆ kô kum mâu cheăm, bêng tơ’lêi hlâu ti tăng ƀă pêi pro tơdroăng cheăng inhên. Pôa Phạm Anh Tuấn, Kăn hnê ngăn Viƀan kong pơlê Gia Lai tối nhên:

‘’Mâu tíu pêi cheăng tơkŭm tơniăn xing xoăng hnoăng cheăng ƀă xing xoăng pơkâ inhên rêm kơvâ cheăng ăm rêm cheăm, bêng. Ki rơhêng vâ tối kăn pơkuâ, phŏ kăn pơkuâ mâu tíu cheăng kơvâ cheăng thế pôu râng hnoăng cheăng châ tơƀrê má mơ’nui dêi kơvâ cheăng tơná tiô túa pơkâ hiăng châ pơcháu, hnê mơjiâng ƀă hnê mơhno cheăm, bêng troăng pêi pro châ tơƀrê mê cho tăng cheăng pêi ăm kuăn pơlê ƀă mơnhông cheăng kâ – rêh ối pơlê pơla. Mâu tơdroăng xiâm kố thế châ pêi ing điên tưh tâi tâng, châ xúa kŏng ngê vâ mâu cheăm bêng ngăn tiô rêm kơvâ môi, ngăn amê vâ ‘nâi troăng tơleăng tơdroăng cheăng’’.