Kơtăn kố pơ’lăng 80 hơnăm hâi lơ 23/9/1945, Khu kăn Việt Minh Dak Lak hiăng pơkâ mơjiâng Khu lêng kong pơlê, tơkŭm mâu lêng tơplâ ki xiâm cho Tiêuh đoân Plâ pro tơleăng lêng N’Trang Lơng ƀă mơjiâng khu lêng sap kong pơlê troh cheăm pơlê. Luâ 8 chât hơnăm tơplâ ƀă xông rơdêi, mâu rơxông kăn ƀô̆, mâu lêng hiăng ôh tá la lâi pơtê pleăng hnoăng tơná, hlâ rêh, veăng kring vế tơnêi têa, chiâng tíu tơngah krá kak dêi Đảng, Tơnêi têa ƀă Kuăn pơlê.

Ƀă pơxá “Krá tơnôu hvêa chêng prôk tiô hlá cơ plâ ƀlêi trâng”, rôh trâm mâ tơpui tơno ai tơpui, hơ’muăn hên tơdroăng ton nah dêi mâu rơxông pro kăn hnê ngăn tung mâu khế hơnăm pá puât, xuân tối ‘na troăng hơlâ mơjiâng mâu lêng tung mâu hơnăm nếo. Rơxông nếo nôkố xuân tối  kô mơ-eăm pơtối rak vế tơdroăng pêi pro ki lĕm ton nah dêi pâ ngoh, rak tuăn loi ƀă tơdroăng ki lĕm dêi kăch măng.

Rôh kố, Khu xiâm pơkuâ ngăn lêng kong pơlê tơrŭm ƀă Khu pơkuâ ngăn khu cheăng Dak Lak tơkŭm mơgêi hneăng tơ’noăng mơ’no tơdrêng tiô troăng hyôh măng tăng ‘nâi plĕng 80 hơnăm Hâi mơjiâng khu lêng tơplâ kong pơlê, diâp 28 pri ăm khu pú hên, mâu ngế ki ai hnoăng pêi cheăng kơhnâ rơkê.