Tung tơdroăng tơkŭm po “Khế mơnúa troh ngăn ôm hyô kong pơlê Lâm Đồng hơnăm 2025”, Tíu ‘măn rak tơmeăm kong pơlê Lâm Đồng tơbleăng troh tơmối ôm hyô ƀă kuăn pơlê mâu túa ki lĕm tro dêi hdroâng kuăn ngo M’Nông prế Mạ. Tung tíu ki rơngiâp lĕm dêi tíu ‘măn rak tơmeăm a Đà Lạt, tơmối châ mơnúa ngăn tơdrêng cheăng tĕn ếo pơtâk hdroâng kuăn ngo ƀă châ hmâng mâu idrâp chuât dêi chêng koăng.

Maluâ hmân ếo pơchoh hlâu rế hía rế hên, mơngế M’Nông ƀă Mạ xuân ối rak cheăng tĕn ếo pơtâk chal krâ môi tiah mơhúa túa lĕm tro hdroâng kuăn ngo. Chêng koăng ôh ti xê to idrâp hơniâp tung rôh po mơdĭng, tơdroăng ki kal kố ối châ tŏn ăm mâu tơmối ôm hyô tơmâng, rế mơjiâng cheăng pêi, rế mơđah tơbleăng ki kơnía dêi túa lĕm tro. Nôkố kong pơlê Lâm Đồng ai lối 127.000 ngế M’Nông ƀă lối 50.000 ngế Mạ, xuân ối rak hên cheăng chal krâ, khôi túa tơlá, tơdroăng tiô khôp dêi tơná.