Hâi lơ 21/9, a Dak Lak, Khu tơkŭm po roh tơ’noăng Tơdroăng tơkêa bro Pơxiâm tăng cheăng pêi Ngiât roh má 11. Khu tơkŭm po tơbleăng 9 tơdroăng tơkêa bro ki rơkê dêi kơpong peăng Tơdế Tơnêi têa - Tây Nguyên a roh Mơgêi lâp tơnêi têa.

Sap ing 26 tơdroăng tơkêa bro veăng tơ’noăng, Khu châm điêm rah 3 tơdroăng tơkêa bro ƀảng A ƀă 6 tơdroăng tơkêa bro ƀảng B. Ki má môi ai mâu tơdroăng tơkêa bro: Têa rơmâ pro ing pôm prế ôh tá hơ’lâk ki klâi Gia Lai, klêa hơhnhon tung dế plâi rơ-âu tơvât ƀă kế tơmeăm ki ing pêi chiâk deăng (Lâm Đồng), pêt kơlá mơdró kâ krá tơniăn (Quảng Ngãi) kế ki pik ngiâ vâ pro lĕm krúa lĕm ing xương rồng tung pơlê, yâ̆m plâi rơrôi Rangfarm (Khánh Hòa) kế ki pik ngiâ vâ pro lĕm ing kơôu plâi rơgá (Lâm Đồng) ƀă Chilinext – ki kơnâ dêi hăng (Đà Nẵng).

Klêi péa roh tơ’noăng vâ rah xo a Pơlê kong kân Hồ Chí Minh ƀă Dak Lak, lâp tơnêi têa hiăng rah xo châ 28 tơdroăng tơkêa bro mot a hneăng mơgêi. Roh ki mơgêi má mơ’nui kô tơkŭm po a Hà Nội sap hâi lơ 26 – 28/9.