Tung hneăng hơnăm 2020-2025, cheăng kơmăi kơmok ƀă on tơhrik hiăng hdró nhên a Khánh Hòa, veăng mơnhông pêi lo kế tơmeăm riân rêm ngế châ lối 113 rơtuh liăn/hơnăm. Kơmăi kơmok a Vân Phong, on tơhrik a Peăng hdroh Khánh Hòa chôa tơ’mot tơdrêng ƀă ôm hyô Nha Trang ƀă Cam Lâm. Mâu tơdroăng mê ăm hlo, kơmăi kơmok ƀă on tơhrik chôa chiâng péa tơmeăm ki nếo, mơnhông Khánh Hòa mot tung “hơnăm mơnhông cheăng châ péa kơxô̆”.

Tiô tối hdrối tơdroăng kal kí pơtroh ăm hneăng hôp Đảng ƀô̆ kong pơlê Khánh Hòa rôh má môi, hneăng hơnăm 2025-2030 tối nhên, vâ châ pơtối rak ki xiâm ‘na kơmăi kơmok ƀă on tơhrik, kal thế “ ‘mâi mơnhông nếo, pơ’lêh ƀă mơnhông tơƀrê tung mơdró kâ dêi Tơnêi têa tiô luât pơkâ ‘na mơdró kâ, ai tiô pơkâ dêi tơnêi têa tung rak ngăn”. Tơdroăng kố xuân môi tuăn ƀă mâ ngăn vâ mơnhông pêi cheăng tơƀrê dêi khu mơdró a kong pơlê. Jâ Trịnh Thị Hồng Vân, Kăn hnê ngăn Kŏng ti Yến sào Khánh Hòa, tối:

“Kŏng ti kô tơbleăng pêi tơdroăng cheăng ‘na kơvâ yến sào chiâng tơdroăng pêi cheăng ki xiâm, khât. Kong ti kô rah iâ mơngế pêi cheăng, tơ’mot tơdjuôm, ăm pơtê mâu tíu pêi cheăng ki ôh tá rơhéa. Ngin kô mơnhông tơƀrê pêi cheăng pơ’lêh kơxô̆. Malối, mâu tơmeăm khoăng vâ pêi cheăng kô pơtối ‘no liăn rôe kơmăi kơmok túa lĕm nếo ai tiô tơdroăng púi vâ’’.

Tơdrêng ƀă pơtối rak vế ki rơdêi ‘na cheăng ƀă kơmăi kơmok tiô hmâ ing nah Khánh Hòa pơkâ troh troăng hơlâ tơ’mot tơdroăng tơkêa bro kơmăi kơmok ki dâi lĕm môi tiah tơmeăm điê̆n tưh, bán dẫn cho tơmeăm chiâng thâu hrik, xup xo, tuăn ngôa rơkê kuăn mơngế hriăn pro, tíu ‘măn kơmăi xiâm rak ngăn tơmeăm khoăng tơnêi têa. Vâ mơnhông tơdroăng pơkâ mê, kong pơlê tơrŭm ƀă tíu xiâm tơnêi têa pro klêi troăng prôk, tơdjêp ing tơraih tơƀai lâp plâi tơnêi Vân Phong, Cam Ranh troh troăng kân tơdrăng Peăng Kơnhŏng - Peăng Hdroh, Peăng mâ Hâi Lo - Peăng Mâ Hâi Lâ ƀă troăng kân rơxế lơtreng ki tơdrăng.

Pôa Trần Minh Chiến, Ngế pơkuâ Rak ngăn Kơpong cheăng kâ ƀă Kơpong hngêi kơmăi kong pơlê Khánh Hòa tối, drêng kong pơlê hiăng hbrâ tơnêi lĕm krúa, on tơhrik - têa kô tơniăn, tơdroăng ki veăng kơjo kum ai tŭm, khu ‘no liăn kô hmiân tuăn vâ ‘no liăn pêi cheăng kâ ton hơnăm.

“Ki tơ’lêi cho mâu pơkâ hdró xoăng kơpong hiăng châ kĭ. lâp kong pơlê Khánh Hòa cho môi toăng rơxế lơtreng, Khu rak ngăn kơpong cheăng kâ ƀă kơmăi hngêi kơmăi cho môi xiâm ki apoăng, veăng ‘no hnoăng ăm Khánh Hòa tâk 2 kơxô̆. Pơkâ gá ti mê, la thế rah  xo khu ‘no liăn ai ivá pêi cheăng rơkê tơdroăng tơkêa bro thế lĭng chiâng pêi’’.

Tơdrêng ƀă tơdroăng cheăng kơmăi kơmok, cho xiâm on tơhrik. Klêi tơ’mot tơdjuôm, tơmeăm khoăng mê dêi Khánh Hòa thăm rế ó tâ. Kong pơlê pơkâ mơnhông pro on tơhrik kơtâu ƀă khía a têa kơxĭ, on tơhrik kơtâu ƀă mâ hâi, on tơhrik kơtâu ƀă LNG, on tơhrik kơtâu ƀă trếo tik nik, ƀă mâu kơmăi kơmok pêi cheăng tiô chal nếo nôkố. 

Malối, péa tơdroăng tơkêa bro on tơhrik kơtâu ƀă trếo tik nik a peăng hdroh Khánh Hòa, ngăn cho troăng pêi  ki kân dêi tơnêi têa, po ăm Khánh Hòa môi tíu vâ mơnhông tơƀrê nếo, rơtế ƀă kơmăi kơmok ki veăng gum, ôm hyô kih thuât ƀă hnê mơngế pêi cheăng rơkê. Pôa Hồ Xuân Ninh, Ngế pơkuâ Tê mơdró Khánh Hòa, ăm ‘nâi kong pơlê dế tơdjuôm ivá ‘na tơdroăng tơkêa bro ki tơviah kal mê.

“Nôkố, tơdroăng chêl thiăn liăn xo tơnêi tíu vâ pro tơmeăm khoăng tơnêi têa ki kân, vâ tối kô tơbleăng rĕng pêi. Tơniăn tiô pơkâ hâi khế mơ’no on tơhrik, tơniăn ăm pêi pro ƀă vâ xúa. Kal thế tơmâng tăng mơngế pêi cheăng rơkê, ai tiô tơdroăng púi vâ dêi mâu khu mơdró”.

Vâ ai tiô tơdroăng púi vâ mơnhông tơbrê ‘na pêi cheăng ƀă kơmăi kơmok  ƀă on tơhrik, kong pơlê Khánh Hòa pơkâ hên troăng hơlâ pêi: ‘mâi hơ’lêh pro hlá mơ-éa, vâ rĕng châ râ kơpêng ăm hlá  mơ-eá mơjiâng pro; mơhnhôk tăng liăn ing pơlê pơla, mơhnhôk tơrŭm cheăng pơla Tơnêi têa ƀă khu mơdró krê dêi kuăn pơlê tung mơnhông pro tơmeăm khoăng, on tơhrik, khoa hok kơmăi kơmok ƀă pơ’lêh kơxô̆; tơmâng khât troh hnê mơngế pêi cheăng “na kih thuât xúa kơmăi ki dâi lĕm; xúa KPI, mơdêk hnoăng cheăng tối nhên dêi mâu kơ koan Tơnêi têa, pro xiâm ki tơ’lêi vâ mâu khu mơdró chiâng xiâm djâ troăng mơnhông tơƀrê. Kăn pơkuâ hnê ngăn Đảng kong pơlê Khánh Hòa - pôa Nghiêm Xuân Thành tối nhên:

“Vâ kong pơlê Khánh Hòa mơnhông cheăng châ 2 kơxô̆, tâk liăn ngân krá tơniăn mê ôh tá ai troăng hơlâ ki lâi cho kơmăi kơmok. Tâng kơmăi kơmok ôh tá ai troăng hơlâ tơƀrê, mơni kô ôh tá kâi pê klêi pơkâ mê.”

Pêi cheăng ƀă Khu kăn pơkuâ hnê ngăn Đảng kong pơlê Khánh Hòa, pôa Trần Thanh Mẫn - Kăn xiâm hnê ngăn Kuô̆k hô̆i khĕn kơdeăn troăng hơlâ dêi kong pơlê vâ tung la ngiâ mơnhông tơbrê nếo:

“Ki pơxúa dêi kong pơlê Khánh Hòa klêi tơ’mot. Mê cho tơmeăm khoăng phá xêh, ki rơdêi tung tơbriât cheăng ƀă tơdroăng ki mơ-eăm mơnhông tơƀrê nếo. Malối ‘na cheăng kâ a têa kơxĭ, ôm hyô- mơdró kâ ‘na ôm hyô, logistics, kơno tuk, kơmăi kơmok uâ pơliê pro tơmeăm ki pê lo, pro ki kố ki mê, ‘mâi pro on tơhrik, on tơhrik krúa, pro Tíu xiâm ‘măn rak tơdroăng chêh tung kơmăi. Thế ngăn nhên tâi tâng, mơnhông tơ’nôm mâu tíu ki rơdêi, mơ-eăm pêi vâ kâi tơƀrê mâu tíu ki pá ôh tá tơhéa’’.

Khánh Hòa dế pơxiâm mot a môi tơdroăng ki nếo ƀă kơmăi kơmok ƀă on tơhrik cho péa tíu xiâm. Kố cho ôh tá xê pơkâ mơnhông cheăng kâ, mê ối cho troăng  hdró  hiăng ‘nâi nhên ki kal  dêi kong pơlê tung pơla tơrŭm cheăng ƀă lâp plâi tơnêi tơmiât troh tơdroăng cheăng pêi ki rơdêi xiâm ‘na kơmăi kơmok, pro on tơhrik krúa ƀă pro kơphô̆ lĕm tiô túa nếo a hơnăm 2030, hlối veăng ‘no hnoăng pêi tiô troăng hơlâ kring tơniăn on tơhrik dêi tơnêi têa.