Hâi lơ 6/7,  a Bra​sil​, pôa Phạm Minh Chính Ngế pro xiâm hnê ngăn tơnêi têa hiăng veăng Hôp mâu kăn BRICS po rơdâ hơnăm 2025 ƀă ai tơbleăng ki kal a rôh Hôp mâu kăn xiâm BRICS po rơdâ ‘na “Mơdêk chuh nghiah hên troăng, mâu tơdroăng cheăng kâ - liăn ngân ƀă tuăn ngôa rơkê kuăn mơngế hriăn pro”.

Rôh hôp tơpui  tơno mê veăng hôp ai 35 ngế kăn xiâm ƀă mâu kăn teăng mâ mâu kong têa tung khu, mâu kong têa tơrŭm ƀă mâu kong têa ki BRICS krếo  veăng hôp, rơtế ƀă mâu kăn mâu khu tơrŭm lâp plâi tơnêi mê cho Khu lâp kong têa, Khu tơrŭm Tê mơdró lâp plâi tơnêi WTO, Khu tơrŭm ngăn pơkeăng lâp plâi tơnêi WHO, mâu khu ngăn liăn ngân vâ mơnhông dêi lâp plâi tơnêi ƀă tung kơpong.

Tơbleăng a rôh hôp, pôa Phạm Minh Chính tối nhên hnoăng veăng ‘no dêi mâu Peăng Hdroh tung tơdroăng rak ngăn lâp plâi Tơnêi. Ngế pro xiâm hnê ngăn tơnêi têa tơbleăng pái tơdroăng pâ thế ki kal, ai pơxúa tung tơrŭm cheăng hên troăng ing xiâm pơkâ dêi Luât Khu lâp kong têa ƀă luât lâp plâi tơnêi, mơdêk ki tơniăn tê mơdró, nhoăm hnoăng ƀă ki pơxúa tro luât, tơxâng dêi mâu kong têa; pơtối rak ki rơdêi dế tuăn ngôa rơkê AI vâ pêi cheăng ăm kuăn pơlê.