Hneăng hôp rôh má 10 kô pơxiâm po a hâi lơ 20/10 ƀă tiô tối hdrối kô mơgêi a hâi lơ 12/12. Tiô tối hdrối Kuô̆k hô̆i kô séa ngăn, pơkâ: 45 tơdroăng tơkêa luât, tơdroăng pơkâ ối tung hnoăng cheăng mơjiâng luât; 13 khu tơdroăng ki kal ‘na cheăng kâ-rêh ối pơlê pơla, liăn ngân tơnêi têa, séa ngăn ƀă pơkâ mâu tơdroăng kal ki ê dêi tơnêi têa; tơdrêng amê hlối ai 13 khu tơdroăng ki kal mâu kơ koan pơtroh mơ-éa tơbleăng vâ mâu kăn Kuô̆k hô̆i hriăn ngăn.

Pôa Phạm Minh Chính, Ngế pro xiâm hnê ngăn Chin phuh tối tiah kố, tơdroăng mơjiâng khu mơjiâng luât tung tơdroăng ki tơnêi têa hnoăng pơkuâ xah hô̆i chuh ngiah dêi kuăn pơlê, xua kuăn pơlê ƀă ăm kuăn pơlê, xua kuăn pơlê pro ngế ki xiâm, tâi tâng.

Ngế pro xiâm hnê ngăn Chin phuh pơkâ thế péa kơ koan tối ăm dêi rơpó, tơrŭm krá tơniăn, tơƀrê; mâu khu xiâm kơvâ cheăng kal tơrŭm ƀă Măt trâ̆n Tơnêi têa tung tơdroăng ki tơmâng mâu rơkong tơpui dêi kuăn pơlê, khu ki rơkê, khu ki hriăn ‘na khoa hok; tơdroăng pêi pro pơkâ thế tŭm têk, ôh tá tơniăn, tơbréa, rế tơniăn tro ‘na mâu tơdroăng pơkâ thế ‘na túa pơkâ, hlá mơ-éa chêh pro, rế rak vế ki rơkê, rế mơdêk tơdroăng pêi pro, krâu, kơtăng; tơrŭm krá tơniăn, tơniăn lĕm pơla mâu kơ koan; mơnhông hnoăng cheăng pôu râng tuăn mơno, tơdrêng amê hlối xúa tuăn ngoâ kuăn mơngế pro. Pôa Phạm Minh Chính, Ngế pro xiâm hnê ngăn Chin phuh tối nhên:

“Pơtối pơhlêh túa tơmiât, mơdêk rơdêi pơhlêh túa chêh pro luât, pơhlêh sap ing túa tơmiât ki hngăm ‘na pơkuâ ngăn chiâng rak vế ‘na túa ki mơjiâng pro ƀă gum cheăng. Kố cho môi tơdroăng pâ thế kơtăng khât tung pơla nôkố. Séa ngăn tung tơdroăng ki ai khât, ai ing tơdroăng ki ai păng ‘nâng, nhuô̆m tơdroăng ki ai khât ƀă xo tơdroăng ki ai khât pro kơxái vê ngăn. Túa tơmiât dêi pin athế pơhlêh tíu kố. Á tối ăm pó, liăn ngân ‘nâi nhên sap ing túa tơmiât, ivá mơ-eăm pơxiâm sap ing tơdroăng pơhlêh, ivá rơdêi cho pơxiâm sap ing kuăn pơlê. Mê hiâm mơno chêh pro luât pin athế hriăn ngăn ƀă pơkâ kơtăng tơdroăng kố”.

Môi tuăn ƀă mâu rơkong tơpui mơgêi dêi pôa Phạm Minh Chính, Ngế pro xiâm hnê ngăn Chin phuh, pôa Trần Thanh Mẫn, Kăn xiâm hnê ngăn Kuô̆k hô̆i vêh tối, tung pơla sap ing nôkố troh rôh po hneăng hôp ôh ti ton xếo, malối cho tung pơla ai hên tơdroăng tơkŭm po ki kal môi tiah hbrâ po Hneăng hôp Đảng lâp tơnêi têa rôh má 14, pôk kăn Kuô̆k hô̆i hneăng 16 ƀă Hô̆i đong hnê ngăn rêm râ pơla hơnăm 2026 – 2031. Laga, Kuô̆k hô̆i, Chin phuh xuân athế hbrâ rơnáu tơniăn ăm hneăng hôp rôh má 10, hneăng hôp má mơ’nui dêi hneăng cheăng Kuô̆k hô̆i hneăng 15.

Kăn xiâm hnê ngăn Kuô̆k hô̆i pơchân, mâu kơ koan chêh pro mơ-éa kal pêi pro tro Luât pơkâ mơ-éa pơkâ thế ‘na luât, mâu tơdroăng pơkâ, túa pơkâ hiăng châ pơkâ. Klêi kơ’nâi rôh hôp kố, Ngế xiâm chêh tôm xo rơkong Kuô̆k hô̆i tơrŭm ƀă Kăn pơkuâ Ƀơrô cheăng Chin phuh séa ngăn tơdroăng pro tiah lâi ăm gá tro ƀă hâi khế tơkŭm po mâu rôh hôp dêi Đảng.

Péa pâ kal pơtối tơrŭm rĕng tâ nếo mâu hlá mơéa, chêh ‘mot tung APP Kuô̆k hô̆i vâ mâu kăn Kuô̆k hô̆i hriăn ngăn. Kăn xiâm hnê ngăn Kuô̆k hô̆i ăm ‘nâi, tung tơdroăng pêi pro rĕng, a hneăng hôp kố, Kuô̆k hô̆i ƀă Chin phuh môi tuăn ôh tá pơtê tơdế hneăng:

“Kuô̆k hô̆i ôh tá tơkŭm po kơ-êng ƀă tiâ mơnhên mê pơhlêh ƀă tơdroăng, Chin phuh pơtroh hlá mơ-éa tơbleăng tŭm vâ Kuô̆k hô̆i tơpui tơno tung môi rôh. Kơ koan pơtroh tơdroăng tơkêa athế hbrâ tŭm mâu tơdroăng ki kal vâ pơchuât tơbleăng tơkŭm ƀă mâu hlá mơ-éa pơtroh tơbleăng ăm Ngế xiâm pơkuâ, ngế pơkuâ kơvâ cheăng pơkuâ tơdroăng kal mê pơchuât tơbleăng. Kơdroh chôu pơchuât rêm kơtâ mơ-éa pơtroh dâng 5 phut, xoăng chôu ăm tơtro ƀă mâu luât, tơdroăng pơkâ tơpui tơno ƀă chôu phut Kuô̆k hô̆i séa ngăn tiê nŭt tơbleăng. Xua tơdroăng cheăng hên, mê hneăng hôp Kuô̆k hô̆i rôh kố pin kô xoăng khu ki vâ tơpui. Tung tơdroăng cho tơpui tơno tiô khu cheăng kâ, khu pơlê pơla, khu mơjiâng luât khoa hok kong ngê̆ cheăng lêng, gâk kring pin klâ xoăng luât tơpui tơno”.

Kăn xiâm hnê ngăn Kuô̆k hô̆i pơkâ thế mâu Ngế xiâm pơkuâ, Kăn hnê ngăn Hô̆i đong hdroâng kuăn ngo, mâu kăn pơkuâ Vi ƀan athế tiô troh tui lui mâu tơdroăng tơkêa Luât xua kơ koan tơná chêh pro, pơtroh, séa ngăn tá troh drêng châ Kuô̆k hô̆i tơbleăng. Rơtế ƀă mê, mâu Ngế xiâm pơkuâ kal séa ngăn kơtăng kơvâ cheăng tơná mơdêk rơdêi xúa kong ngê̆ thong tin, pơhlêh kơxô̆, malối cho ứng dụng tuăn ngoâ kuăn mơngế pro tung tơdroăng séa ngăn mâu luât ki hdrối, hlá mơ-éa ki nếo vâ rak tơniăn tŭm rĕng tơƀrê.

Pôa Trần Thanh Mẫn, Kăn xiâm hnê ngăn Kuô̆k hô̆i môi tuăn ƀă pôa Phạm Minh Chính, Ngế pro xiâm hnê ngăn Chin phuh drêng tối tiah kố, péa pâ kal tơrŭm tung hiâm mơno tơrŭm; tối nhên, hneăng hôp cho ƀlêi chiâng tơdjuôm dêi Chin phuh, Kuô̆k hô̆i ƀă kăn pơkuâ dêi Khu pơkuâ xiâm Đảng, Khu xiâm ngăn tơdroăng cheăng kal kí, Khu kăn chêh tôm xo rơkong ƀă pôa Tô Lâm, Kăn xiâm pơkuâ hnê ngăn cheăng Đảng.