Nôkố, a kong pơlê Gia Lai ai dâng 8 rơpâu khu mơdró kâ, ƀă tâi tâng kơxô̆ liăn chêh inâi lối 120 rơpâu rơtal liăn. Tung kơxô̆ ki kố, ai lối 47% cho khu mơdró kâ kŭn. Xua mê, tơdroăng ki mơdêk ivá rơdêi dêi khu mơdró kâ ing tơdroăng ki hơ’lêh kơxô̆ ai pơxúa kal khât ƀă tơdroăng ki mơnhông cheăng kâ rêh ối pơlê pơla a kong pơlê. Rôh hôp hnê hriâm kố tơbleăng mâu tơdroăng ki hlê plĕng ‘na hơ’lêh kơxô̆ ăm khu mơdró kâ, tơdroăng ki phá tơ-ê ƀă dêi rơpó pơla rak ngăn khu mơdró kâ, rak ngăn tê kế tơmeăm tiah hmâ ƀă tung kơmăi kơmok, hơ’lêh kơxô̆; ai mâu túa pơkâ hơ’lêh tơbleăng ƀă tơdroăng ki xúa hơ’lêh kơxô̆ tơtro ƀă khu mơdró kâ ki kŭn, ki kŭn khât ƀă khu pêi cheăng tơrŭm.

Mơnhên tơdroăng hơ’lêh kơxô̆ cho tơdroăng ki ôh tá chiâng lôi, kong pơlê Gia Lai xuân ai hên tơdroăng pêi cheăng vâ kum mâu khu mơdró kâ, môi tiah po hên rôh hnê hriâm, tŏng kum mâu website, kum mâu khu mơdró kâ ăm mâu kế tơmeăm dêi tơná, malối cho kế tơmeăm pêi lo ing chiâk deăng ƀă kế tơmeăm OCOP mot tung mâu tíu tê mơdró điê̆n tưh.