Tiô riân troh hâi lơ 6/5, tâi tâng kơxô̆ tơdroăng mơjiâng pro dêi 7 tơdroăng tơkêa bro hngêi trung ai tíu kâ koi ối ối pơtê tơdjêp râ a tơkăng kong peăng mâ hâi Luô kong pơlê Gia Lai nếo châ dâng 40% ki kơnâ mơjiâng pro; tung mê, ai 6 tơmeăm ôh tá tơniăn tơdroăng mơjiâng pro tiô pơkâ. Mơhé mâu khu ki mơjiâng pro hiăng mơdêk kơxô̆ liăn pêi cheăng hên tâ tâng pơchông ƀă tơdroăng mơhá liăn ki tơ’mô tơdjuôm laga xuân ôh tá ai ngế pêi cheăng.

Vâ pêi kêi đeăng mâu tơmeăm hdrối khế 7/2026, teăm tơdrêng vâ hriâm hơnăm nếo, Khu pơkuâ Tơdroăng tơkêa bro Mơ’no liăn mơjiâng pro kong pơlê Gia Lai tiô tối hdrối kal tơ’nôm dâng 500 ngế pêi cheăng. Tiô tối hdrối tung khế 5 kố, khu lêng ối tung kong pơlê kô veăng tŏng gum mâu tơmeăm ki tơ’nôm, ôh tá pơkâ kih thuât ki rơkê vâ kơdroh pá ăm kŏng nhân ăm mâu khu ki mơjiâng pro.