Péa kăn xiâm pơkuâ tối phiu ro drêng châ mơnhông mơdêk châ tơƀrê ó rơdêi dêi tơrŭm cheăng Việt Nam - Ấn Độ klêi kơ’nâi 10 hơnăm mơjiâng Khu tơrŭm cheăng ton xŏn Tâi tâng. Péa pâ môi tuăn hên troăng prôk la ngiâ vâ pơtối pêi trâu hơngế tơrŭm cheăng tung mâu kơvâ cheăng. Tung mê, tơrŭm gâk kring tơnêi têa – gâk kring tơniăn pơtối châ mơnhên cho trăng ki xiâm ki kal. ‘Na cheăng kâ, tê mơdró ƀă mơ’no liăn cheăng, péa tơnêi têa môi tuăn mơjiâng tơdroăng ki châ tơƀrê hluâ pơkâ tung tơdjêp mơjiâng pro pơtroh tê, tơdroăng ki kơnâ lâp plâi tơnêi tiô troăng rơtế ƀlêi trâng, rơtế ai pơxúa.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên Việt Nam hbrâ mơdêk rôe tơmeăm ing kong têa Ấn Độ, tơdrêng amê pơkâ thế peăng Ấn Độ chôa ‘lâng tah lôi mâu pơkâ ƀă tơmeăm Việt Nam. Péa pâ xuân môi tuăn xo khoa hok – kŏng ngê̆, pơhlêh nếo tơmiêt pêi rơkê ƀă pơhlêh xúa kŏng ngê̆ pro ki xiâm ăm hneăng mơnhông mơdêk nếo dêi tơrŭm cheăng pơla péa pâ.