Kơnâi hôp, Đảng ƀô̆ kong pơlê Gia Lai nôkố ai 74 khu tơrŭm, cheăng Đảng ƀă tâi tâng kơxô̆ lối 10.800 đảng viên. Tối tâi tâng tơdroăng cheăng hiăng pêi ăm hlo ƀă ki pá, ki hâi pêi dêi hneăng hdrối nah, Hneăng hôp kân pơkâ thế pêi tơƀrê tung hneăng 2025-2030. Tung mê, GRDP tâk tơdâng riân rêm hơnăm châ lối 10%; riân rêm ngế pê lo hơnăm 2030 châ lối 6.300 dollars, lâp tung kong pơlê ôh pá ai xếo rơpŏng kơtiê; tâi tâng kơxô̆ liăn xo nâp ăm hngêi rak liăn troh hơnăm 2030 châ lối 41.000 rơtal ƀă tâi tâng kơxô̆ liăn châ xo ing tê kế tơmeăm ăm kong têa ê châ lối 17 rơtal dollars.

Vâ ai tiah mâu tơdroăng pơkâ, Đảng ƀô̆ kong pơlê Gia Lai tối 5 tơdroăng ki tâk hên mê cho: tơkŭm a tơdroăng cheăng pêi ƀă kơmăi kơmok pro ki kố ki mê, hriăn pro tơmeăm, ‘na on tơhrik ‘mâi pro, pêi cheăng ƀă kơmăi kơmok krúa lěm, bán dẫn po mâu tơmeăm chiâng hrik xup xo ƀă AI. Mơnhông ôm hyô chiâng kơvâ cheăng kâ ki xiâm ngăn a ki tơ’lêi hlâu mơnhông tiah cheăng kâ a têa kơxĭ, sinh thái nhâ loăng kuăn kuâ, túa lěm tro.

La ngiâ pêi cheăng ƀă kơmăi ki dâi lěm, pêt loăng kong krá tơniăn, mơjiâng kơpong pêi cheăng kâ kân ‘na chiâk deăng – kơmăi kơmok. Mơjiâng mâu kơpong pêi cheăng logistics drô troăng kân 19 ƀă troăng kân tơdrăng Quy Nhơn- Pleiku. Pro kơphô̆ ƀă krá tơniăn, rơtế ƀă kơchô mơdró tơnêi hngêi trăng.

Pôa Hồ Quốc Dũng, Ngế cheăng tung Tíu xiâm Đảng, Kăn hnê ngăn Tỉnh ủy Gia Lai pơkâ thế đảng ƀô̆ Vi ban kuăn pơlê dêi kong pơlê tối nhên hnoăng cheăng pêi, tơrŭm, pơ’lêh nếo, tơƀrê tung tuăn tơmiât, pơkâ kơtăng tung pêi pro vâ tơkâ luâ xơpá, pơloăng mơnúa. Kong pơlê tơkŭm pêi 6 tơdroăng cheăng ki kal. Tung mê, kal mơdêk ki tơƀrê tăng ‘nâi plěng ăm Tỉnh ủy, Khu pêi cheăng dêi Tỉnh ủy ‘na mơnhông cheăng kâ – pơlê pơla, ‘na lêng kring tơniăn ƀă tơrŭm pêi cheăng ƀă lâp plâi tơnêi; ‘nâi nhên tíu ki “pá”, tíu ki ‘’tơkoh’’ vâ ai troăng hơlâ tơƀrê tung tơdroăng lêi tah; tơkŭm tăng liăn ‘no mơjiâng pro tơmeăm khoăng tơnêi têa, tơ’mot ‘no liăn pêi cheăng pá gong kơxô̆ liăn tơnêi têa, mơdêk tơrŭm pêi cheăng pơla khu mơdró tơnêi têa ƀă khu mơdrŏng; mơnhông tơrŭm pro tơmeăm khoăng tơ’mô, tơdjêp ƀă kơpong; pơ‘lêh túa pêi cheăng tâk rơtế ƀă cheăng kâ ngiêt, cheăng kâ pơ’lêh tung lâp plâi tơnêi, cheăng kâ kơxô̆; mơnhông pêi chiâk xúa kơmăi kơmok ki dâi lěm, kơmăi pro tơmeăm, uâ pơliê tơmeăm pêi lo, ‘mâi pro on tơhrik, ôm hyô; tơniăn rêh ối pơlê pơla, mơnhông tơdroăng rêh ối kuăn pơlê, malối a kơpong kuăn ngo, kơpong hơngế hơngo. Kăn hnê ngăn Tỉnh ủy Gia Lai Hồ Quốc Dũng tối nhên:

“Pâ thế Đảng ủy Vi ƀan kuăn pơlê dêi kong pơlê hneăng ki nếo thâ hnê tối trâu rơdâ tơdroăng pơkâ dêi hneăng Hôp troh tâi tâng kăn ƀô̆, đảng viên ƀă kuăn pơlê mơjâng tơdroăng pêi pro ƀă pơkâ tơbleăng nhên tơrêm pơkâ. ‘Nâi nhên hâi khế ƀă xiâm liăn vâ pêi cheăng, mơjiâng luât séa ngăn, tăng ngăn, mơhnhôk pêi đi đo, teăm tơdrêng vâ tah ki xơpá tơvâ tơvân, tơniăn pơkâ mê rěng châ xúa tung rêh ối, pro pơ’lêh nhên ing mâu hâi apoăng, khế apoăng, roh ki apoăng dêi hneăng”.

Ƀă tơdroăng hmâ pêi pro tơrŭm dêi rơpó, púi vâ mơnhông, ing tuăn tơmiât hơ’lêh nếo ƀă mơ-eăm  pêi pro. Đảng ƀô̆  Vi ƀan kuăn dêi pơlê kong pơlê Gia Lai kô pơtối rak vế pêi pro hnoăng cheăng ki xiâm, djâ troăng a hdrối tung ‘mâi hơ’lêh, pêi cheăng tiô túa nếo ‘na pro hlá mơ-éa; mơ-eăm pê klêi mâu pơkâ, tơdroăng cheăng dêi Pơkâ Hneăng hôp kân 2025-2030, veăng mơjiâng Gia Lai mơnhông rěng, ngiât, krá kâk, chiâng kong pơlê mơnhông tơƀrê tung lâp tơnêi têa.