Kơpong hngêi kơmăi kơmok Peăng hdroh Pleiku (cheăm Bờ Ngoong, kong pơlê Gia Lai) châ Ngế pro xiâm hnê ngăn Chin phuh kĭ troăng hơlâ mơ’no liăn cheăng khế 9/2019. Tơdroăng tơkêa bro kân vâ chê 200 ha, tâi tâng kơxô̆ liăn mơ’no lối 500 rơtal liăn, xua Grup pơkuâ Kŏng ngiê̆p Kơxu Việt Nam pơkuâ mơ’no liăn cheăng. Pơkâ xiâm cho kêi đeăng hneăng má môi tung hơnăm 2022 ƀă tơbêng kơpong kơmăi kơmok tung pơla 5 hơnăm. Laga, troh nôkố tơdroăng tơkêa bro xuân tá hâi chiâng pêi pro xua tơvâ ‘na mơ-éa pơkuâ tơnêi têa, pơhlêh pơkâ pêi.

A roh séa ngăn tơnêi tơníu nếo achê kố, pôa Hồ Quốc Dũng, Kăn pơkuâ hnê ngăn cheăng Đảng kong pơlê Gia Lai hiăng pơkâ khu mơ’no liăn cheăng thế kêi đeăng kơmăi pro mơgrúa têa ki mơ’no lo pakong ƀă mâu tơmeăm pakong tung pơla 4 khế, tơdrêng amê tơrŭm krá tơniăn ƀă mâu khu, kơvâ cheăng vâ mơdêk rĕng tơdroăng mơjiâng pro. Pôa Lê Trung Kiên, Kăn pơkuâ Kŏng ti pêi cheăng tiô rơnó môi khu Kơxu Chư Sê – tíu pêi cheăng tơdrêng amê pêi pro tơdroăng tơkêa bro – tối ăm ‘nâi:

‘’Klêi kơ’nâi hnê mơhno dêi kăn pơkuâ kong pơlê, kŏng ti hiăng tơdah châ tơdroăng hnê mơhno dêi khu pơkuâ kơpong cheăng kâ Gia Lai. Ngin kô pêi pro mâu tơmeăm pakong kơpong, pơhlêh tơdroăng tơkêa bro mơ’no liăn cheăng tơtroƀă pơkâ luât, tơdrêng amê pơtối pơkâ kong pơlê kĭ troăng hơlâ mơ’no liăn cheăng ƀă thâ mơjiâng vâ djâ tung tơdroăng tơkêa bro ăm tơtro ƀă pơkâ luât, tơdrêng amê pơtối pơkâ thế kong pơlê kĭ troăng hơlâ mơ’no liăn cheăng ƀă thâ mơjiâng vâ djâ tơdroăng tơkêa bro pêi cheăng’’.

A bêng Pleiku, tơdroăng tơkêa bro tíu ối sinh thái CK54 châ mơnhên cho ‘’kế po’’ vâ mơjiâng tơdroăng ki mơhnhôk mơdêk mơjiâng tíu rêh ối tê mơdró, tơdrêng amê cho ivá mơnhông ki kal ăm kơvâ ôm hyô ƀă tê mơdró. Tơdroăng tơkêa bro kân 240 ha, pơ’leăng mâ mơngế tiô tối hdrối dâng 17.000 ngế, mơnhên troăng prôk la ngiâ mơjiâng tíu kơdrâm kuăn pơlê tiô túa ki nếo hngêi trăng troăng klông tiô rơxông nếo, tơkŭm ai hên tơmeăm khoăng  ‘na tê mơdró, hnê hriâm, khăm pơlât, xah hêi ƀă tơ’noăng ivá. Pôa Đặng Toàn Thắng, Kăn hnê ngăn Viƀan bêng Pleiku, tối ăm ‘nâi, bêng thăm peie pro tơrŭm ƀă mâu tíu cheăng ki tơdjâk vâ kêi đeăng tâi tâng tơdroăng cheăng vâ teăm tơdrêng pơxiâm po a roh Mơjiâng tơnêi têa la ngiâ.

‘’Kơpong kuăn pơlê rêh ối tê mơdró sinh thái CK54 châ pêi pro cho tíu ki mơnhông, cho kế ki po kum mơdêk mơnhông cheăng kâ – rêh ối pơlê pơla dêi bêng. Ai hên tơmeăm ki má môi mơtiha plông xah golf 18 trŭm, kơpong tê mơdró, siêu thĭ rôe tơmeăm vâ chê 5 ha, kơdrum reăng têa, hngêi ăm tơmối kâ koi 5 hơlŏng, tíu xiâm hneăng hôp...Ƀă kong kế lĕm, kong prâi lĕm, tơdroăng tơkêa bro cho tíu mơhnhôk mơ’no liăn cheăng, ôm hyô ƀă châ tâ châ hlo’’.

Xuân tung roh pêi cheăng pơla kố nah a mâu cheăm bêng peăng mâ hâi Luô, Kăn pơkuâ hnê ngăn cheăng Đảng kong pơlê ƀă Kăn hnê ngăn Viƀan kong pơlê Gia Lai hiăng lăm séa ngăn inhên mâu tơdroăng tơkêa bro kân ki ê môi tiah plông golff Đăk Đoa, kơpong ôm khôi túa lĕm – tíu kơdrâm kuăn pơlê rêh ối tê mơdró sinh thái ngo loăng hngó Pleiku ƀă mâu hngêi ăm tơmối kâ koi ối pơtê – plông xah golff FLC a Đăk Đoa. Kăn pơkuâ kong pơlê Gia Lai hnê mơhno kơtăng mâu khu cheăng, cheăm,bêng thăm kêi đeăng mơ-éa tro tiô luât  vâ vêh po tơdroăng tơkêa bro kố.

Tơdroăng kong pơlê Gia Lai kơtăng pêi pro mâu tơdroăng tơkêa bro ‘’hiêt lôi’’ kô kum mơnhông tơmeăm ki ai hlâu kơpong peăng mâ hâi Luô, mơjiâng mâu tơdroăng tơtêk nếo ƀă mơdêk châ tơƀrê xúa tơnêi tơníu ƀă mơngế mơ’no liăn cheăng tung kong pơlê./.