VOV4.Xơ Đăng - Tơpui a rôh hôp tơpui tơno ‘na hnoăng cheăng hbrâ mơdât pơreăng COVID-19 a pơlê kong kân a kơxê măng lơ 17/2, pôa Chử Xuân Dũng, kăn phŏ hnê ngăn Vi ƀan pơlê kong kân Hà Nội ăm ‘nâi, Khu pơkuâ ngăn Đảng pơlê kong kân hiăng môi tuăn ƀă tơdroăng pơkâ ăm vâi hdrêng mầm non vêh hngêi trung hriâm sap ing hâi lơ 1/3; Khu ngăn hnê hriâm ƀă hnê mơjiâng tuăn ngoâ rơkê hriăn ngăn, mơjiâng túa pơkâ, pơkâ mơ’no, tí tăng ‘nâi plĕng ‘na tơdroăng kố, tung mê tơtrŏng troh mâu troăng hơlâ tơkŭm po rak tơniăn, rơkê, tơƀrê la pôi tá kơtăng luâ râ, pêi pro tiô tơdroăng ki rơhêng vâ dêi kuăn pơlê.

Pôa Chử Xuân Dũng pơkâ thế rêm râ, kơvâ cheăng, kong pơlê pêi pro kơhnâ, ngăn kố cho hnoăng cheăng ki kal, hbrâ rơnáu tơrŭm ƀă hngêi trung tơbleăng kơtăng hnoăng cheăng hbrâ mơdât pơreăng, rak tơniăn tơkŭm hnê hriâm tơniăn, tơbleăng tơdâng tơ’mô hnoăng cheăng ki ăm hok tro vêh hriâm a hngêi trung, châ kuăn pơlê, hngêi trung, hok tro hâk vâ ƀă hiâm mơno ki phiu ro.

Katarina Nga tơplôu ƀă tơbleăng