Mâu hâi Khía rơxăm khế 8 kố, Hà Nội to mơngiơk hlá cơ khêi hơlŏng trĭng. Tơdroăng thăm kơdrâm phiu ro tâ drêng tơkŭm po roh pơtâp tâi tâng ăm lêng prôk pơtăng a Plông kân Ba Đình lĭch sưh. A mâu troăng kân khu lêng prôk pơtăng prôk tơkâ hluâ, kuăn pơlê hiăng tơkŭm kơdrâm sap ing kơxo má. Ai hên ngế ing mâu kong pơlê hơngế troh ing hâi hdrối ƀă rĕng xông koi lo a troăng ti tăng tíu ki lĕm vâ châ ngăn khu lêng prôk pơtăng tơkâ hluâ. Pú hmâ Mai Hương troh ing Quảng Ninh tối:

“Á muăn xông koi sap ing 5h30 ngin muăn lăm kơxo má vâ rah mâu tíu ki lĕm vâ rơtế rêm ngế ngăn troăng kân kơphô̆ ƀă ngăn mâu khu lêng prôk pơtăng tơkâ hluâ’’.

Roh pơtâp tâi tâng roh má 2 tơkŭm po kơmăng lơ 24/8 pơla kố nah ƀă tơdroăng ki veăng lối 16.300 ngế lêng ƀă 43 khô̆i prôk, 18 khô̆i tâng; 6 khô̆i rơxế ka nŏng dêi khu lêng kuăn pơlê Việt Nam ƀă 8 khô̆i rơxế đăk chŭng Kŏng an. Ki rơhêng vâ tối, ƀă tơdroăng ki veăng dêi khu lêng kong têa Rusi, Lếo ƀă Kul hiăng kum mơhno kơdrâm phiu ro tơdroăng troăng prôk tơpui kâ gâk kring tơnêi têa Việt Nam. Hâk tơngăm ối tung khu ‘’Ngế kơdrâi lêng ‘na pơtâng tối tơdroăng’’ prôk pơtăng roh kố, Thiê̆u tă Nguyễn Thị Mùi, lêng chuyên ngiê̆p tối ki tâ rơrêk tung hiâm mơ’no klêi kơ’nâi hên khế pơtâp vâ châ kơteăng chêng a plông kân Ba Đình:

‘’Prôk kơteăng a plông kân Ba Đình, á tâ hâk tơngăm ‘nâng, môi tiah châ tơ’nôm visa mê prôk kơteăng ó rơdêi, kơteăng pro kơtăng. Tơkâ khán đài mê ngin o châ ngăn ngi peăng plông kân, ki má lối peăng Tíu ‘măn poăng Pôa Hồ, ƀă ngiâ méa ƀă tâ hơniâp lĕm, pêng păm tơdroăng ki hâk tơngăm’’.

Roh tơkŭm pơtâp hiăng mơhnhôk châ tơdroăng tơmâng ki má môi dêi kuăn pơlê pơlê kong xiâm ƀă tơmối. A mâu troăng kơphô̆ tíu khu lêng prôk tơkâ hluâ, to hlá cơ khêi hơlŏng trĭng kơneăng tung rơkong tơkêk kơdrâm phiu ro. Rêm kơteăng chêng ó rơdêi, khu prôk pơtăng xâp hmân ếo lĕm dêi khu lêng, kŏng an ƀă khu kuăn pơlê hiăng pro mơnhông tơdroăng hâk tơngăm hdroâng mơngế, mơnhông tơdroăng ki tơbâ khên tơnôu dêi môi tơnêi têa krá kâk tung tơplâ xâ, krá tơniăn tung mơjiâng ƀă gâk kring tơnêi têa.

Hên ngế kuăn pơlê ing kong pơlê hơngế hơngo, thăm nếo tá tơmối lâp plâi tơnêi hiăng ai mâ sap ing kơxo vâ châ hlo tơdroăng ki krip krih kố.

Roh pơtâp lôi ăm tung hiâm mơno kuăn pơlê tâ rơrêk, loi tơngah ƀă hâk tơngăm trâu hơngế ‘na Khu lêng kuăn pơlê, Kŏng an kuăn pơlê ƀă ivá ó rơdêi tơrŭm môi tuăn dêi hdroâng mơngế Việt Nam.