VOV4.Xơ Đăng - Kơxo lơ 18/2, a Tíu xiâm mơhno túa lĕm tro Kinh Bắc, pơlê kong kơdrâm Bắc Ninh, Tĭnh ŭy Bắc Ninh tơkŭm po hôp khu chêh hlá tơbeăng tơbleăng ‘na mâu tơdroăng leh tơbâ 190 hơnăm mơjiâng ƀă 25 hơnăm vêh mơjiâng kong pơlê.  Tiô Khu tơkŭm po, sap hâi lơ 26/1 troh hâi lơ 28/2 a pơlê kong kơdrâm Bắc Ninh ƀă mâu tơring, pơlê kong krâm tung kong pơlê tơkŭm po hên tơdroăng leh tơbâ 190 hơnăm mơjiâng ƀă 25 hơnăm vêh mơjiâng kong pơlê Bắc Ninh.

Ki rơhêng vâ tối, leh tơbâ tơkŭm po a kơxo hâi lơ 26/2/2022 ƀă tơdroăng ngê̆ thuât ki phá tơ-ê ƀă tơdroăng pơxá ‘’Bắc Ninh – Eăng bâ khôi túa lĕm tro vâi krâ nah’’ kô vêh pro ‘na Bắc Ninh – Kinh Bắc, môi kơpong tơnêi ton nah, khôi túa lĕm tro vâi krâ nah; ƀă hên tơdroăng mơnhông mơdêk khôi túa vêa vong, khôi túa kơhnâ hriâm rơkê, mâu ngế ki rơkê… ƀă tơdroăng cheăng kăch măng.

Pôa Ngô Văn Liên, Kăn pơkuâ tơdroăng loi tĭng tiô khôp tĭnh ŭy Bắc Ninh tối ăm ‘nâi, klêi kơ’nâi 25 hơnăm vêh mơjiâng, Bắc Ninh, nôkố, Bắc Ninh hiăng chiâng pơlê kong kơdrâm, kong pơlê pêi cheăng xúa kơmăi kơmok tiô troăng rơxông nếo ƀă hên pơkâ cheăng kâ, rêh ối pơlê pơla ối má môi dêi lâp tơnêi têa.

A Sa Ly tơplôu ƀă tơbleăng