VOV4.Xơ Đăng - A tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa pơkuâ roh hôp mơ’no tơdrêng tung um tiô troăng măng Internet lâp tơnêi têa ‘na tơdroăng lôu péa hngêi trung hriâm mâu kong pơlê. Mơgêi a roh hôp, Ngế pro xiâm phŏ hnê ngăn tơnêi têa tối rơdêi: Tơdroăng lăm hriâm dêi vâi hdrêng cho kal, ôh tá xê to drêng ai pơreăng mê tá drêng ôh tá ai pơreăng. Vâi hdrêng ối a hngêi tung môi pơla ton kô chiâng tơdroăng ki ôh tá lĕm tro; ôh tá xê to ‘na khôi túa lĕm tro, tơdroăng ki hlê plĕng, mê tơdjâk ton xŏn troh tơdroăng mơnhông mơdêk dêi vâi hdrêng.

Mơnhên hbrâ mơdât pơreăng COVID-19 cho ton xŏn, pôa Vũ Đức Đam vêh tối tơdroăng thế pro tơniăn mâu tơdroăng mơnhông mơdêk cheăng kâ – rêh ối pơlê pơla tung tơdroăng tiah hmâ nếo, ƀă troăng pêi kâi trâng tơniăn, ƀeăn ƀĕng rơkê, mơdât châ tơƀrê pơreăng.

Ngế pro xiâm phŏ hnê ngăn tơnêi têa pơchân tối apoăng troh tơdroăng pâk vaccine hbrâ mơdât COVID-19 ăm vâi hdrêng sap ing 5 troh 11 hơnăm. Rơtế amê, môi tuăn tơdroăng vâi hdrêng lăm hriâm tơdrêng mê kơxô̆ mơngế tro tâ tâk; ki kal cho kâi mơdât tơdroăng pơreăng xông tâ tú, ai troăng pơlât mâu ngế tro tâ F0, F1 tơtro.

A Sa Ly tơplôu ƀă tơbleăng