A Dak Lak, hdrối vâ troh rơnó kong mê têa kân hơnăm kố, 50 rơpŏng a mâu kơpong thông kĭng têa kroăng Kỳ Lộ ối tung mâu cheăm Tuy An ƀă Đồng Xuân hiăng châ gum pro ăm 50 toăng hngêi đông vâ ối tung rôh kong mê têa kân. Rêm toăng hngêi rơdâ 20m2, pa kơdâm krâ 16 kơthung phi chhá tung ôh tá ai ki klâi pro ivá ăm gá đông; péa to trăng ƀê tông pơkâ troăng. Drêng kong mê têa kân tâk đik, toăng hngêi ki kố kô đông tiô kơdró têa, gum kuăn pơlê ai tíu hmuâ ối tơniăn.

Hdrối mê, klêi kơ’nâi rôh kong mê têa kân sap nah hâi chói ai a khế 11 hơnăm nah, lối 600 toăng hngêi ai tíu ki trá xŏn châ pro sap ing tơdroăng cheăng pêi thâ Quang Trung, gum lối 600 rơpŏng ai tíu ối tơniăn.

Pakĭng mê, sap ing kơxô̆ liăn tơnêi têa ƀă mâu kơxô̆ liăn mơhnhôk veăng tơlo gum ki ê, kong pơlê Dak Lak dế pơtroh mâu ngế cheăng, kế tơmeăm vâ pro 100 toăng hngêi ăm pơlê kuăn pơlê ối tung pơla kong mê têa kân ƀă tíu pro dâng 220m2, hngêi râ má 4 krá kâk, ai kế ki mơdât tơro têa, ai hngêi lăm ti dế ƀă ai tíu pêi hmê, ăm dâng 200 ngế ối. Nôkố, mâu toăng hngêi ki kố dế mot tung pơla vâ xúa.

Tiah mê, rơnó kong mê têa kân hơnăm kố, cheăng hbrâ ví têa kân lân lu dêi kuăn pơlê a mâu kơpong thông kong pơlê Dak Lak hiăng châ hbrâ. Pôa Đào Mỹ, Phŏ kăn hnê ngăn Vi ƀan kong pơlê Dak Lak, tối:

"Ngin pơkâ thế mâu Khu pơkuâ ngăn, mâu tíu pêi cheăng ki pro veăng pêi pro tiô túa ki rĕng má môi, tâng chiâng. La ôh tá xê xua rĕng mê pin ôh tá vâ tơmâng troh ki krá kâk. Nôkố, ngin dế pơtối séa ngăn hnê mơhno hbrâ rơnáu mâu kuăn pơlê a râ cheăm bêng vâ hmâ ƀă tơdroăng ki tơná hbrâ rơnáu xêh ƀă mâu tơdroăng ki trâm a kong pơlê”.