Châ mơhnhôk pêi pro ing hâi lơ 7/3, tơdroăng tơ’noăng koh phiu ro leh tơbâ 120 hơnăm Hâi mơjiâng kong pơlê Dak Lak ƀă dó inâi “Pói vâ mơjiâng kong pơlê Dak Lak kro lĕm, rơkê, pêng păm khôi túa lĕm” hiăng châ hên tơdroăng ki châ tơƀrê hôm ‘nâng.

Mâu kơ koan, tíu cheăng, tơring tung kong pơlê hiăng pêi pro hên tơdroăng cheăng ki kal khât, châ tơƀrê, ing mê, ai hên troăng pêi ki má môi, rơkê môi tiah: Kŏng an kong pơlê Dak Lak kêi đeăng 1.200 tơmeăm hngêi ối kum rơpŏng kơtiê, pá puât ‘na hngêi ối, rơpŏng ai hnoăng tơnêi têa, kuăn pơlê hdroâng kuăn ngo tung kong pơlê; Vi ƀan Măt trâ̆n Tơnêi têa Việt Nam kong pơlê po rơdâ pêi pro mơjiâng 300 toăng hngêi rŭm môi tuăn ăm mâu rơpŏng kơtiê; Vi ƀan tơring Krông Pắč pêi pro trăng pêi “Rêh tung hiâm mơno kuăn pơlê’’; Vi ƀan pơlê kong kơdrâm Ƀuôn Ma Thuột ƀă tơdroăng tơkêa bro kơdrum reăng Phan Huy Chú, um meăn Mậu Thân, kơdrum reăng Nguyễn Tất Thành.