Veăng hôp ai 160 ngế, tung mê 21 ngế kăn râ kơpêng veăng hôp Khu kăn ƀă 7 ngế tung khu pơkuâ cheăng. A rôh hôp, Đăi tă Trần Minh Trọng - Phŏ Chính ủy Quân khu 5 tơmâng xo, khĕn kơdeăn mâu tơdroăng hiăng châ pêi pro ki Đảng ƀô̆ pơkuâ ngăn lêng kong pơlê Dak Lak hiăng pêi châ tơƀrê tung hơnăm hdrối kô hía nah; xuân môi tiah tơdroăng hbrâ hneăng hôp ƀă tơkŭm pê klêi 12 hneăng hôp Đảng ƀô̆ dêi hneăng hơnăm 2025-2030 ƀă mơjiâng Pơkâ hneăng hôp hneăng ki kố.

Pôa Nguyễn Đình Trung, Kăn hnê ngăn  Tỉnh ủy, kăn hnê ngăn Đảng ƀô̆ pơkuâ ngăn lêng kong pơlê Dak Lak ăm ‘nâi, Pơkâ dêi hneăng hôp châ mơnhên pơxá “Pơtối rak vế pêi pro ki lĕm dêi mâu êng tơplâ kong pơlê Dak Lak khên tơnôu; tơkŭm mơjiâng Đảng ƀô̆ krúa, mâu lêng tơplâ kong pơlê rơdêi tâi tâng, mơ-eăm pê klêi hnoăng cheăng pơcháu ăm mâu lêng, kring gak tơnêi têa Việt Nam xah hô̆i chuh ngiah tung tơdroăng rêh ối nôkố.