Pơxiâm hneăng 2025-2030, Đảng ƀô̆ Vi ƀan Kuăn pơlê dêi kong pơlê Dak Lak pơkâ pêi lo tơmeăm tâk tung lâp kong pơlê riân rêm ngế sap 11,5%  tơngi klêng tung môi hơnăm; tâi tâng pơxúa kơxô̆ liăn pê lo ing têa tơmeăm ăm kong têa ê châ 13 rơtal dollars; tơ’mot 43 rơtuh ngế tơmối ƀă khu modró châ dâng 97.150 rơtal liăn; kơdroh kơxô̆ rơpŏng kơtiê riân châ 2% tung hơnăm, krê kơpong kuăn ngo kơdroh 3% tung môi hơnăm.

Ki kal mơnhông cheăng kâ cho “pŭn khu tơdroăng pêi xiâm” mê cho pêi cheăng ƀă kơmăi kơmok, pêi chiâk deăng xúa kơmăi ki dâi lĕm, Ôm hyô khoa hok kơmăi kơmok, hriăn plĕng pơ’lêh nếo, pơ’lêh kơxô̆ ƀă mơnhông rế hên mơngế pêi cheăng rơkê. Tơbleăng hnê mơhno a hneăng hôp, Kăn hnê ngăn Tỉnh ủy Dak Lak Nguyễn Đình Trung tối nhên, hneăng hôp rôh kố ôh tá xê to pêi tơkŭm mơgêi tơdroăng cheăng pêi hneăng ki hdrối, mê ối pơkâ xiâm mâu tơdroăng vâ pêi tung mâu hơnăm la ngiâ, tối hnoăng cheăng hnê djâ dêi Đảng ƀô̆ Vi ƀan kuăn pơlê dêi kong pơlê drô troăng pêi pro tơdroăng púi vâ kro mơdrŏng dêi kong pơlê Dak Lak.