Tung tơdroăng pêi cheăng, mâu kăn tơkŭm tơpui tơno, ăm hnê tối ‘na hồ sơ tơdroăng tơkêa bro ‘mâi hơ’lêh, tơ’nôm Luât Măt trâ̆n tơnêi têa Việt Nam, Luât Kong đoân, Luât Droh rơtăm, Luât pêi pro tro tuăn kuăn pơlê a cheăm. 

Pakĭng mê, hneăng hôp xuân séa ngăn hlá mơ-éa luât tơbleăng tơkŭm hnê tối, pâ thế dêi kuăn pơlê ƀă kuăn pơlê pơtroh ăm rôh hôp má 9, Kuô̆k hô̆i hneăng 15.  A hneăng hôp teăng mâ Chin phuh xuân tối mâu tơdroăng ki tơdjâk troh tơdroăng tơ’mot tíu pêi cheăng râ kong pơlê, lôi râ tơring ƀă pơtối rah xo pro rế lĕm râ cheăm.

Tơbleăng a rôh hôp, pôa Đỗ Văn Chiến, Kăn xiâm hnê ngăn Vi ƀan xiâm Măt trâ̆n tơnêi têa Việt Nam pơkâ thế mâu kăn pơtối rak vế pêi pro tro tuăn kuăn pơlê, veăng ‘no hnoăng pêi pro vâ pê klêi mâu hlá mơ-éa chêh pơtroh ăm râ kơpêng séa ngăn, pơkâ.

A hneăng hôp, pôa Nguyễn Chí Dũng, phŏ ngế pro xiâm hnê ngăn tơnêi têa xuân hiăng tối mâu tơdroăng kal ‘na tơdroăng cheăng kâ-rêh ối dêi tơnêi têa, tung tơdroăng tơ’mot mâu tíu pêi cheăng râ kong pơlê, ôh tá tơkŭm ai râ tơring, pơtối tơ’mot mâu tíu pêi cheăng râ cheăm.