Hâi lơ 14/4, a Hà Nội po hneăng hôp Tơrŭm cheăng pơla mâu kong pơlê Việt Nam - Pơhlăng rôh má 12.  Hneăng hôp ai pơxá Xua mơnhông mơdêk krá ton ƀă tŭm tơdroăng” ƀă veăng ai lối 60 to kong pơlê péa kong têa rơtế ƀă mâu khu tơrŭm dêi kơvâ cheăng, mâu khu mơdró. Pơxiâm po hneăng hôp, pôa Đinh Tiến Dũng, Kăn hnê ngăn Đảng pơlê kong kân Hà Nội ăm ‘nâi, troh nôkố ai lối 38 to kong pơlê dêi Pơhlăng ƀă 18 to kong pơlê, pơlê kong kân dêi Việt Nam tơrŭm cheăng, ƀă 240 tơdroăng tơkêa bro pơla mâu kong pơlê dêi péa  tơnêi têa tung hên tơdroăng cheăng mê cho ‘na pơkeăng pơlât, hnê hriâm, rak tơmeăm khoăng kơnía ton nah, kuăn pơlê tơpui nâl Pơhlăng, mơnhông thôn pơlê, mơnhông krá tơniăn ton...

Tơpui a hneăng hôp, pôa Trần Lưu Quang, Ngế xiâm phŏ hnê ngăn tơnêi têa khĕn kơdeăn khât tơdroăng tơpui dêi hneăng hôp “Tơrŭm cheăng pơla mâu kong têa mơnhông cheăng kâ krá tơniăn klêi ai pơreăng kân COVID-19’’, khĕn kơdeăn Hà Nội hiăng hriăn plĕng tơkŭm po hneăng hôp ai pơxúa vâ mơdêk tơrŭm cheăng pơla mâu kong pơlê ƀă tơpui tơno ƀă kuăn pơlê péa tơnêi têa.