Hneăng hôp hiăng pêi pro klêi troăng hơlâ vâ túa pơkâ kăn pơkuâ péa râ pêi cheăng tơƀrê. Vi ƀan hnê ngăn kong pơlê Gia Lai dế dêk rĕng tơdroăng ki pro mâu tơdroăng tơkêa ki kal môi tiah: troăng hdrâp kơxô̆ 2 a Tơriah tơƀai Phù Cát; troăng kân Quy Nhơn – Pleiku; Kơpong pêi cheăng ƀă kơno tuk Phù Mỹ; Tíu tê mơdró CK54; ƀă Tíu pêi cheăng peăng Hdroh Pơlê kong kơdrâm Pleiku.

Pôa Hồ Quốc Dũng, Kăn pơkuâ ngăn Đảng pơkâ thế séa ngăn tâi tâng tơdroăng pơkâ pêi hnoăng cheăng, xoăng nhên tơdroăng cheăng ăm rêm ngế, nhên tơdroăng cheăng, nhên hnoăng cheăng pôu râng; tơdrêng amê hlối tơrŭm lăm ngăn mâu pơkâ, troăng hơlâ hiăng pơkâ dêi Gia Lai prếi Bình Định vâ mơnhên tối tơdroăng tung pơla kơ koan cheăng tơnêi têa nếo klêi kơ’nâi ‘mot tơkŭm.