Hâi lơ 8/12. Khu kăn xiâm Đảng ƀô̆ kong pơlê Quảng Ngãi tơkŭm po Hôp rôh má 2, tối tơdroăng pêi tung hơnăm 2025, tối nhên tơdroăng cheăng ki kal pêi tung hơnăm 2026 ƀă tơpui, pơkâ mâu tơdroăng cheăng pêi ki kal cho hnoăng pơkúa. Hơnăm 2025, kong pơlê Quảng Ngãi thâ xing xoăng pro rế lĕm mâu tíu pêi cheăng, mâu kăn ƀă tơbleăng pêi cheăng mâu kăn cheam bêng kong pơlê 2 râ, chôa pêi cheăng tơniăn, tơkŭm po klêi rôh hôp Đảng ƀô̆ rêm râ ƀă mâu kăn Đảng ƀô̆ kong pơlê rôh má 1, hneăng hơnăm 2025- 2030.

Hơnăm 2025, tâi tâng tơmeăm pêi lo tung kong pơlê châ lối 92 rơpâu rơtal, tâk lối 10% ối má môi kơpong prêa hdroh Tơdế Tơnêi têa ƀă Tây Nguyên; ối má 6/34 kong pơlê, pơlê kong kơdrâm kong kân tung lâp tơnêi têa. Kong pơlê hiăng pêi troh tơdroăng rêh ối pơlê pơla, tah hngêi pơtân, hngêi xi kơchoh, tơdroăng xăm kơtiê châ pêi tơbrê; cheăng lêng, kring gak tơniăn ‘na kal ki, tơniăn pơlê pơla.