Tơkâ luâ 7 khu tơ’noăng vâ châ kâ a rôh tơ’noăng hriăn pro tơmeăm khoăng ing mâu chhá ki hiăng hvât lôi xua Đoân dêi cheăm po,  tơmeăm Lơ gât Việt Nam dêi Chi đoàn ƀuôn Čuôr Dăng A mơhno ki hriăn rơkê tung pêi pro. Mâu đoân viên hiăng xúa, ‘’xok’’ kế hvât lôi vâ pro tơmeăm hlối ai pơxúa chiâng xúa vâ hnê tối. Nâ H Tuyết Niê, Kăn pơkuâ hnê ngăn Chi đoân ƀuôn Čuôr Dăng A, cheăm Čuôr Dăng, tơring Čư̆ Mgar tối:

“Troh tơ’noăng akố, chi đoân pơlê a djâ lơgât Việt Nam ki pro ing mâu tơmeăm ki hiăng hvât lôi, xúa nếo tung rêh ối rêm hâi mê cho hlá mơ-éa, klŏng hrik ôu têa ku kŭn, kơlâp kung kếo ƀă mâu tơmeăm xúa ki ê. Tơmeăm ngin pro vâ mơhnho tơdroăng pâ dêi pơlê, tơnêi têa, xuân vâ mơhno hiâm mơno hâk tơngăm dêi hdroâng mơngế, hnoăng pơkuâ ƀă pơkuâ tơniăn lâp tơnêi têa. Ing mê, á xuân môi tiah mâu vâi o rơxông nếo kô pơtối mơ-eăm hriâm tâ, rơnêu pât vâ mơjiâng ƀă kring vế Tơnêi têa krá tơniăn ton”.

Tơdrêng ƀă tơ’noăng, hôp tơpui tơno, khế Droh Rơtăm hơnăm kố a Dak Lak ai hên tơdroăng pêi pro tơkŭm pú hên, mâu tơdroăng pleăng hnoăng tơná xua kuăn pơlê. Pơxá “Droh Rơtăm xông rơdêi, vâ pleăng hnoăng tơná pêi cheăng xua tơdroăng rêh ối kuăn pơlê’’, hên tơdroăng pêi pro châ tơkŭm po hên môi hdroh tung lâp kong pơlê mê cho Hâi tĭng lĕm, hâi hên ngế lăm pleăng hnoăng tơná veăng mơjiâng kơphô̆ rơkê plĕng, lăm pêi hnoăng cheăng hnê kuăn pơlê pơhlêh kơxô̆.

Tơdrêng ƀă mâu tơdroăng pêi pro tơdjuôm xua đoân râ kơpêng tơbleăng pêi, đoân râ cheăm bêng xuân pro hên tơmeăm khoăng, tơdroăng cheăng pêi ai pơxúa, tơtro ƀă ki ai khât a pơlê cheăm, tíu pêi cheăng dêi tơná. Nâ H’Vinh Êban, Chi đoân ƀuôn Kroa B, cheăm Čuôr Dăng, tơring Čư̆ Mgar ăm ‘nâi, vâ chê 300m troăng ai chúa hlá cờ Tơnêi têa hiăng châ khu Đoân Droh Rơtăm pro klêi vâ troh tơbâ mâu hâi leh kân tung khế 3.

Tơdrêng amê, droh rơtăm xuân kơhnâ veăng mơgrúa klông troăng, pro lĕm hyôh kong prâi, trâ văng nhâ êa rơtôh drô péa pâ troăng, tôm xok ki vâi hvât hmâng vâ a kơpong kơnhŏng kơneăng têa Ea Mkang ƀă pêt loăng a mâu kơpong drô troăng prôk, a plông xah hêi.

“A ƀă vâi pú đoân viên droh rơtăm hiăng lo pro troăng prôk ai chúa hlá cờ droh rơtăm, pêt reăng giấy ƀă mơgrúa văng krúa tíu kleăng kơneăng têa. Ing mâu tơdroăng pêi pro mê, á tâ hơniâp ro xua á hiăng veăng ‘no ivá a tơdroăng mơjiâng mâu tơmeăm khoăng, hnoăng cheăng pêi dêi droh rơtăm tung pơlê”.

Tiô ngoh Y Lê Pas Tơr, Phŏ Kăn hnê ngăn Đoân Droh Rơtăm kong pơlê, Kăn hnê ngăn khu droh rơtăm Việt Nam kong pơlê Dak Lak, luâ 3 măng tĭng tơbleăng mâu tơdroăng pêi pro tung khế droh rơtăm, hiăng ai vâ chê 220 khu pleăng hnoăng cheăng, pêi lối 200 tơmeăm khoăng a mâu tíu kuăn pơlê ối. Vâ chê 160 khu lâm hriâm Bình dân học vụ số châ mơjiâng, veăng kơjo gum hnê vâ hlê ‘na tơdroăng kơxô̆ ăm kuăn pơlê. Droh rơtăm tung lâp kong pơlê xuân hiăng veăng tơlo liăn, hâi pêi cheăng veăng pro 25 toăng hngêi tung tơdroăng tơdjuôm xut tah hngêi pơtân, hngêi xi kơchoh.

Tíu ki nếo dêi Khế Droh Rơtăm hơnăm kố cho mâu tơdroăng pêi pro mơhnhôk tơ’noăng veăng têa tah hngêi pơtân, hngêi xi kơchoh; pêi tơƀrê tơdroăng Pơkâ kơxô̆ 57-NQ/TW dêi khu xiâm Kal kí ‘na ki tơƀrê mơnhông khoa hok, kŏng ngê̆, pơ’lêh nếo hriăn plĕng ki nếo ƀă pơ’lêh kơxô̆ dêi mâu kong têa tơbleăng ing tơdroăng mơhnhôk hriâm lâm Bình dân học vụ số. Drêng xo tơdroăng hnê, rêm râ khu xiâm Đoân hiăng ai pơkâ nhên, teăm tơdrêng pêi ing apoăng.

“Mơjiâng mâu pơkâ krê ăm Khế Droh Rơtăm, pêi pro tiô tơdroăng pơkâ thế pêi dêi hơnăm xuân môi taih mâu tơdroăng cheăng pêi tung khế. Xoăng mâu pơkâ pêi nhên ăm tơrêm ăm mâu Đoân tơring, pơlê kong krâm, kong kơdrâm ƀă Đoân kong pơlê ƀă Đoân ki pơkuâ hnê mơjiâng mâu đô̆i pêi cheăng rơkê tơrêm râ, pro xiâm ki vâ tơdâng tơ’mô tơdrêng tung lâp kong pơlê. Ngin kô mơ-eăm xúa hên tâ nếo kŏng ngê̆ kơxô̆ tung mâu tơdroăng cheăng vâ tơbleăng pêi trâu rơdâ tâ, rĕng ƀă tơƀrê má môi troh ƀă đoân viên, droh rơtăm’’.

Khế Droh Rơtăm hơnăm 2025 hiăng vâ chê tâi ƀă mâu tơdroăng mơhno hdró ki lĕm dêi mâu hơnăm ối nếo mâu hdroâng kuăn ngo Tây Nguyên - kơhnâ vâ pêi cheăng ƀă ing tuăn vâ ƀă púi vâ pleăng hnoăng tơná. Mâu tơmeăm khoăng dêi droh rơtăm pro, mâu tơdroăng cheăng pleăng hnoăng tơná ôh tá xê to pro pơxúa ăm kuăn pơlê mê ối mơhnhôk rêm ngế ai tuăn pâ tơrŭm dêi rơpó, môi tuăn hâk vâ ƀă hlê tung tơdroăng mơjiâng pơlê pơla. Luâ tâ mâu kơxô̆, mê cho mâu rơkong hâk tó, mâu kơpeăng kŏng rơtế ‘no ivá ƀă mâu plâi nuih pêng hên tơdrăng hâk vâ.

Tơdroăng pêi pro dêi hơnăm ối nếo ôh tá xê pơtê to a Khế droh rơtăm mê ối pơtối tơbleăng troh lâp lu tung tơrêm tơdroăng pêi pro ki kŭn tung rêm hâi, veăng pro ăm kơpong Tây Nguyên rế mơnhông tơbrê  rơdêi, kro mơdrŏng.