Kơxo hâi lơ 19/4, a Hà Nội, Khu xiâm Kŏng an tơrŭm ƀă Hô̆i đong Tơpui kâ xiâm tơnêi têa, Học viện Chính trị Quốc gia Hồ Chí Minh ƀă Khu ngăn hnê mơhnhôk cheăng xiâm tơnêi têa tơkŭm po hneăng hôp tơpui ‘na khoa hok râ Tơnêi têa “Kŏng an kuăn pơlê ƀă tơdroăng pêi pro tiô Pơkâ Hneăng hôp mâu kăn tung lâp tơnêi têa rôh má 13” dêi Đảng. A hneăng hôp mâu kăn tơkŭm mơnhên troăng rơhlâ, tơdroăng pơkâ dêi Đảng ‘na kring vế tơnêi têa, kring tơniăn tơnêi têa pơlê pơla ƀă mơjiâng Kŏng an kuăn pơlê tung hneăng Hôp kân má 13.

Tung mê, tơmâng khât tơdroăng tăng ‘nâi plĕng, vâ ‘nâi mâu tơdroăng ki nếo tung mâu tơdroăng hlê plĕng, tơpui tơno ƀă tơdroăng ki ai khât ƀă kring vế Tơnêi têa, kring vế tơniăn tơnêi têa pơlê pơla, mơjiâng Kŏng an kuăn pơlê tiô tơdroăng Pơkâ hneăng hôp kân má 13 dêi Đảng. Tơdroăng hneăng Hôp má 13 dêi Đảng malối tối nhên ki tơƀrê dêi mâu kăn ƀô̆, đảng viên, ki hdrối cho mâu kăn ƀô̆ ki xiâm.

Mê cho mâu kăn ƀô̆ ôh tá xê to ai tŭm ivá, mê ối thế ai kuăn pơlê loi nhoăm. Ai tiah mê ‘nôi, hnoăng cheăng hnê mơhno, hnoăng pơkuâ dêi Đảng nếo kâi tơniăn, pro ăm Đảng tơdâng tơ’mô ƀă tơdroăng cheăng.