Klăng roh lăm pôu pêi cheăng a kong pơlê Bến Tre, kơxê lơ 13/4, jâ Võ Thị Ánh Xuân, Kăn xiâm phŏ hnê ngăn tơnêi têa hiăng troh lăm pôu, diâp kơxuô tơmeăm ăm rơpŏng ai hnoăng tơnêi têa, rơpŏng kơtiê ƀă vâi hdrêng ai tơdroăng rêh ối pá puât a tơring Mỏ Cày Nam (kong pơlê Bến Tre) – pơlê xiâm dêi tơdroăng rơtế xông tơbriât pơkuâ 1960.

Jâ Võ Thị Ánh Xuân hiăng kơ-êng ‘na tơdroăng rêh ối, tơdroăng pêi cheăng dêi kuăn pơlê ƀă tối phiu ro drêng châ hlo pơlê xiâm pêt mơjiâng hên plâi rơ-âu rế hía rế mơnhông mơdêk. Jâ Võ Thị Ánh Xuân, Kăn xiâm phŏ hnê ngăn tơnêi têa hiăng mơhnhôk kăn ƀô̆ ƀă kuăn pơlê Bến Tre tối tơdjuôm ƀă tơring Mỏ Cày Nam thế pơtối mơnhông mơdêk khôi túa khên tơnôu dêi pơlê xiâm kăch măng “xiâm rêi” dêi tơdroăng xông tơplâ xâ tơbriât pơkuâ ton nah, tung pêi cheăng pêt mơjiâng tơmeăm, mơjiâng pơlê xiâm rế hía rế kro mơdrŏng lĕm.

Roh kố, Kăn xiâm phŏ hnê ngăn tơnêi têa hiăng diâp 50 kơxuô tơmeăm ăm mâu rơpŏng kơtiê, rơpŏng ai hnoăng kăch măng, 200 hnoăng liăn hriâm rơkê ăm mâu vâi o hok tro ai tơdroăng rêh ối pá puât ƀă 10 toăng hngêi tuăn pâ ăm mâu rơpŏng ai hnoăng a tơring Mỏ Cày Nam (kong pơlê Bến Tre).