Kơxo lơ 14/4, ngế cheăng tung khu pơkuâ tíu xiâm Đảng, jâ Võ Thị Ánh Xuân  - Kăn xiâm phŏ hnê ngăn tơnêi têa rơtế ƀă khu kăn ki pêi dêi hnoăng cheăng dêi Ƀơrô cheăng Kăn xiâm hnê ngăn tơnêi têa, kăn pơkuâ kong pơle Bến Tre hiăng troh pôu, hbru tơmeăm ăm mâu rơpŏng ki ai hnoăng ƀă kăch măng a tơring Giồng Trôm ƀă Ba Tri, kong pơlê Bến Tre.

Troh pôu rơpŏng pôa Trương Vĩnh Trọng, Ngế pro xiâm phŏ hnê ngăn Chin phuh hneăng hdrối, Kăn xiâm phŏ hnê ngăn tơnêi ƀă khu kăn ki pêi dêi hnoăng cheăng hiăng tâp nhăng tơbâ troh mâu kăn ƀô̆, đảng viên djâ troăng ahdrối, kăn pơkuâ ki têm rơpiât, hmâ a chê ƀă kuăn pơlê. Jâ Võ Thị Ánh Xuân pôu kơ-êng, rơkâu ivá jâ Hồ Công Cẩn kơdrâi pôa Trương Vĩnh Trọng, Ngế pro xiâm phŏ hnê ngăn Chin phuh hneăng hdrối ƀă rơpŏng ai hên tơdroăng ro, hơniâp.

Rơtế tung hâi ki mê, jâ Võ Thị Ánh Xuân, Kăn xiâm phŏ hnê ngăn tơnêi têa ƀă khu kăn ki pêi dêi hnoăng cheăng hiăng troh pôu, hbru tơmeăm ăm nôu Việt Nam khên tơnôu Phan Thị Ren, ối a kơtâu Nhơn Quới, cheăm Mỹ Nhơn, tơring Ba Tri. Kăn xiâm phŏ hnê ngăn tơnêi têa kơ-êng ivá ƀă rơkâu ivá nôu rêh hơniâp, rêh ai hên ivá ƀă rơpŏng, kuăn cháu.