Hluâ lối 4 khế hnê mơhno, ƀă hiâm mơno kơdo, khŏm mơ-eăm hên dêi khu pú hên kăn ƀô̆, mâu lêng, ki rơhêng vâ tối cho mâu khu pú pơtối veăng hnê mơhno pơtâp, pơtâp ăm mâu khu, tơdroăng hnê mơhno hiăng châ tơƀrê lĕm. Pôa Nguyễn Trọng Nghĩa mơnhên hiâm mơno hnê mơhno kơtăng, tơdrêng amê, pơkâ mâu tíu cheăng tơtrŏng rak ivá, tơniăn lĕm tro ăm leh ăm lêng prôk pơtăng leh tơbâ 50 hơnăm Hâi tơleăng lĕm peăng Hdroh tơnêi têa.

Pôa Nguyễn Trọng Nghĩa tối nhên, mâu kăn pơkuâ Đảng, Tơnêi têa ƀă Khu hnê mơhno Tơnêi têa đi đo séa ngăn ƀă kheăn kơdeăn tơdroăng hnê pơtâp mâu khu lêng ƀă khu kuăn pơlê dêi khu lêng, kŏng an, Pơlê kong kân Hồ Chí Minh ƀă hên kong pơlê tung lâp tơnêi têa. Leh tơbâ ôh tá xê to roh pơ-ôu pơ-eăng tơdroăng roh ton nah mê ối pơtroh tơdroăng loi tơngah tung la ngiâ, khu lêng rế hía rế ó rơdêi.