Hâi lơ 7/5, a Hải Phòng, Quân chủng Hải quân tơkŭm po leh tơbâ 70 hơnăm Hâi mơjiâng khu lêng tuk kuăn pơlê Việt Nam (7/5/1955 - 7/5/2025) ƀă tơdah xo Mê dai Hồ Chí Minh. Pôa Lương Cường, Kăn xiâm hnê ngăn tơnêi têa, Kăn hnê ngăn Hô̆i đong lêng - Kring tơniăn, Pơkuâ Khu lêng tơplâ kuăn pơlê veăng leh ƀă hlối diâp Mê dai Hồ Chí Minh ăm Quân chủng Hải quân.

Diâp Mê dai Hồ Chí Minh, hnoăng mơhá kơnía git dêi Đảng, Tơnêi têa ăm Quân chủng Hải quân ƀă tơbleăng a rôh leh, teăng mâ Kăn xiâm Đảng, Tơnêi têa, pôa Lương Cường, Kăn xiâm hnê ngăn tơnêi têa hâk mơnê rơkâu, khĕn kơdeăn mâu hnoăng hiăng pêi pro ƀă veăng ‘no kân kĭn dêi khu lêng tuk kuăn pơlê Việt Nam tung tơdroăng cheăng kăch măng ki lĕm dêi Đảng, dêi hdroâng mơngế tung 70 hơnăm hdrối kô hía nah.

Kăn xiâm hnê ngăn tơnêi têa tối nhên, mâu hơnăm la ngiâ, tơdroăng tung lâp plâi tơnêi , kơpong hơniâp lĕm, tơrŭm cheăng xuân cho xiâm; la pơtối hlo oh tá tơniăn, pá vâ ’nâi hdrối, tơbriât dêi rơpó pơla mâu kong têa ki kân, mâu tíu xiâm, kăn xiâm tơpeăng dêi rơpó ó khât. Kăn xiâm hnê ngăn tơnêi têa tối nhên, têa kơxĭ, chuăn cho tíu ki kal xiâm ăm tơdroăng mơnhông cheăng kâ-rêh ối pơlê pơla, tơrŭm tơrôa ƀă lâp plâi tơnêi, cho troăng hơlâ ki kal ‘na cheăng lêng, kring tơniăn.

Tơniăn ‘na hnoăng pơkuâ chuăn têa kơxĭ Tơnêi têa cho tuăn  mơ-eăm, púi vâ, cho hnoăng cheăng pêi dêi tâi tâng Đảng, tâi tâng kuăn pơlê, tâi tâng mâu lêng pin, tung mê ai lêng tuk kuăn pơlê Việt Nam cho mâu lêng ki xiâm.