Ngế ki má 3 tro tơro têa hlâ a kong pơlê Kon Tum a 10 chôu kơxo hâi lơ 7/5. Drô troăng lăm veăng mĕn pro hngêi trăng vêh a hngêi, pôa Nguyễn Hồng, 63 hơnăm ối a cheăm Đăk Hring, tơring Đăk Hà kơdrâ tro tơro têa bê hlâ rơngó.

Châ hlo tơdroăng kố kuăn pơlê djâ pôa troh a Hngêi pơkeăng cheăm Đăk Hring thâ pơlât laga ôh tá kâi prêi, pôa hiăng hlâ. Drêng kố, pôa Hồng tro tơro têa cho kong dế mêi râ kân. Hdrối mê, hâi lơ 14/4 ƀă lơ 26/4 tung tơring Ngọc Hồi, kong pơlê Kon Tum xuân ai 2 roh tơro têa pro 2 ngế hlâ ƀă 7 ngế tro rong.