Xông tơpui hnê mơhno, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tơdroăng hbrâ rơnáu troh nôkố hiăng klêi tro tiô pơkâ, tro tiô pơkâ luât, pêi pro tơdâng tơ’mô, krá tơniăn. Hên kong pơlê, pơlê kong kơdrâm pêi pro rơkê tơtro, tơbleăng teăm tơdrêng môi tiah Thái Nguyên, Bắc Ninh, Hà Nội, Hải Phòng, Lạng Sơn, Đà Nẵng, Lâm Đồng, Dak Lak, An Giang.

Kăn xiâm hnê ngăn Kuô̆k hô̆i pơchân tối Khu xiâm pơkuâ kăn ƀô̆ thăm séa ngăn tơdroăng in phĭu rah xo, mơ-éa chêh tơdroăng rêh ối hriâm tâp ƀă tơdroăng pêi cheăng dêi ngế ki tơbriât to pro kăn, ôh tá ăm ai tơdroăng ki tá tro; mơdêk xúa kŏng ngê̆ thông tin, hên troăng pêi trâm mâ kuăn pơlê, kơjo mơ’no tơdrêng tung tiô troăng hyôh măng vâ po rơdâ tíu ki veăng.

Tung la ngiâ, pơkâ cho ôh tá chiâng tơngôu, tơkŭm po lĕm tro mâu roh hôp trâm mâ kuăn pơlê, tơniăn kuăn pơlê pơkuâ dêi hnoăng cheăng, tơdâng tơ’mô, tro luât.