Pêi pro hnê mơhno dêi pôa Trần Hồng Hà Phŏ Ngế pro xiâm hnê ngăn tơnêi têa a rôh hôp tơdrêng rôh má 31 Khu hnê mơhno dêi tơnêi têa ‘na mơdât tơnăng ká ôh tá tro luât, ôh tá tơbleăng ƀă ôh tá tiô pơkâ IUU, Vi ƀan kuăn pơlê dêi kong pơlê Lâm Đồng nếo ai hlá mơ-éa pơtroh ăm mâu khu xiâm kơvâ cheăng cheăm bêng tơbleăng pêi mâu tơdroăng rak ngăn, séa ngăn nhên mâu tuk ká ôh tá tŭm hlá mơ-éa  ôh tá krá lĕm vâ lăm tơnăng.

Vi ƀan kuăn pơlê dêi kong pơlê Lâm Đồng pơkâ thế Khu xiâm ngăn ‘na Chiâk deăng ƀă Hyôh kong prâi pơkuâ, hnê ăm Khu xiâm ngăn ká xi xŏng ƀă chuăn thâ riân, chêh inâi tŭm tuk ká ôh tá ai tŭm ivá, hlá mơ-éa pêi cheăng tiô tơrêm cheăm. Tơdroăng riân mê tá kơxô̆ chêh inâi mau tuk, inâi tuk, mah định danh VNeID, tíu ối ƀă kơxô̆ phôn krếo pơtroh ăm mâu cheăm bêng tung hâi lơ 26/2/2026 vâ tơkŭm rak ngăn, tăng ngăn nhên.

Riân troh mơ’nui khế 2/2026, lâp tung kong pơlê Lâm Đồng ai 8.207 toăng tuk tơnăng ká; tung mê ai 7.234 toăng tuk hiăng tâi hâi khế hlá mơ-éa phêp tơnăng, châ lối 88%; 973 toăng tuk ôh tá ai tŭm ivá pêi cheăng hiăng chêh inâi rak ngăn, tăng ngăn nhên ƀă ôh tá ăm lo ing kơno lăm  tơnăng.